ខេត្តមណ្ឌលគិរី
ចេញផ្សាយថ្ងៃអាទិត្យ០៣កើត ខែចេត្រ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៧ខែមេសាឆ្នាំ២០១៩ !
បទល្មើសកាប់បំផ្លាញធនធានធម្មជាតិនៅតែបន្តកើតមាននៅក្នុងខេត្តមណ្ឌលគិរី ចំពោះអាជ្ញាធរ និងសមត្ថកិច្ចប្រចាំដែនដីនៅមិនទាន់ធ្វើការរឹតបន្តឹងឲ្យមានប្រសិទ្ធភាពតាមគោលការណ៍របស់រាជរដ្ឋាភិបាលនៅឡើយទេ។
សេចក្តីរាយការណ៍បានឲ្យដឹងថា នៅព្រឹកថ្ងៃទី០៦មេសា ២០១៩នេះមានរថយន្តខ្នាតយក្សមួយគ្រឿងបានផ្ទុកឈើពេញប្រៀបធ្វើចរាចរណ៍ចេញពីដែនដីរដ្ឋបាលស្រុកកោះញែក ខេត្តមណ្ឌលគិរី។
យោងតាមប្រភពព័ត៌មានបានបង្ហេីបថា ឈ្មួញឈើនេះត្រូវបានគេសង្ស័យថា គឺជាអ្នកមានលុយ និងមានអំណាចជាប់ខ្សែស្រឡាយជាមួយបុគ្គលអ្នកមានអំណាចនៅក្នុងដែនដីនោះផងដែរ ហេីយសកម្មភាពដឹកជញ្ជូនឈើតាមរថយន្តខ្នាតយក្សធំៗចេញពីខេត្តមណ្ឌលគិរី នាំឆ្លងដែនចូលទៅក្នុងទឹកដីប្រទេស វៀតណាមនោះ គេបានសង្កេតឃើញថា កើតមានបន្តរហូតដោយមិនដឹងថា តើការដឹកជញ្ជូនឈើទាំងនោះ ស្របតាមច្បាប់ដែរឬយ៉ាងណា?។
ពេលថ្មីៗកន្លងមកនេះ អគ្គបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មាការជាតិ ទប់ស្កាត់ និងបង្ក្រាបបទល្មើសធនធានធម្មជាតិ នាយឧត្តមសេនីយ៍ សៅ សុខា បានដាក់ចេញនូវបទបញ្ជាយ៉ាងម៉ឹងម៉ាត់ ដល់មន្ត្រីក្រោមឧិវាទ ឲ្យបន្តពង្រឹងលើការទប់ស្កាត់ និងបង្ក្រាបបទ ល្មើសព្រៃឈើ ដែលជាធនធាន ដ៏មានតម្លៃរបស់ជាតិ ឲ្យបាន ហើយបទល្មើសព្រៃឈើ ដែលកើតមាននៅលើទឹកដីខេត្តណា ខេត្តនោះត្រូវតែធានាបង្ក្រាប ឲ្យបានជាដាច់ខាត។
ក្រោយការដាក់ចេញនូវបទបញ្ជានេះ ឃើញថា មានសភាពស្ងប់ស្ងាត់មួយរយះខ្លីប៉ុណ្ណោះ តែនៅពេលនេះ ក៏ចាប់ផ្ដើមកើតមានឡើងវិញជាដដែលដោយសារមានការធូររលុងពីមន្ត្រីជំនាញដូចជាខ័ណ្ឌរដ្ឋបាលព្រៃឈើ មន្ត្រីបរិស្ថាន ដែលជាការផ្គើនទៅនឹងបទបញ្ជារបស់ប្រធានគណៈកម្មាការជាតិទប់ស្កាត់បង្ក្រាបបទល្មើសធនធានធម្មជាតិ នាយឧត្តមសេនីយ៍ សៅ សុខា ជាពិសេសបទបញ្ជារបស់សម្តេចនាយករដ្ឋមន្ត្រី ហ៊ុន សែន នោះតែម្តង។
ធ្វេីសេចក្ដីរាយការណ៍ដោយអង្គភាពសារព័ត៌មាននិងគេហទំព័រ”ខ្មែរអច្ឆរិយៈ”http/www.khpress.net
(លេខទូរស័ព្វ ០១២:៥០៥៣៤៤/០៩៣:៤៤៥៥៥៨)