ខេត្តស្វាយរៀង
ចេញផ្សាយថ្ងៃសុក្រ០៩រោជ ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៩ខែមីនា ឆ្នាំ២០១៩!
ពលរដ្ឋ អះអាងថា អាជ្ញាធរច្រកព្រំដែន នៅតែបណ្ដោយឱ្យនាំចូលជ្រូកពីវៀតណាម មកកាន់ប្រទេសកម្ពុជា ខណៈអាជ្ញាធរវៀតណាមបានសម្លាប់ជ្រូក និងដុតចោល អស់រាប់ពាន់ក្បាលបន្ទាប់ពីរកឃើញថា កើតជំងឺផ្ដាសាយជ្រូក ឬហៅថា អាហ្វ្រិកខេនស្វាញ ហ្វ៊ីវើ (African Swine Fever (AFS)ហេីយ ពួកគាត់បារម្ភថា ជំងឺនេះ នឹងរាលដាលមកកម្ពុជា បើអាជ្ញាធរពាក់ព័ន្ធមិនមានវិធានការទប់ស្កាត់បង្ក្រាបឱ្យបានខ្ពស់នោះទេ។
ពលរដ្ឋរស់នៅតាមក្បែរព្រំដែនកម្ពុជា-វៀតណាមនៃស្រុករមាសហែក ខេត្តស្វាយរៀងថា សមត្ថកិច្ចពាក់ព័ន្ធតាមព្រំដែនមិនបញ្ឈប់ការនាំជ្រូកពីវៀតណាមនោះទេ។ សកម្មភាពនាំចូលជ្រូកទាំងនោះ ក្រុមឈ្មួញបានបង្វែងដាន ដោយដឹកជញ្ជូនតាមរ៉ឺម៉ក ជំនួសដោយរថយន្តធំៗ។ រីឯពលរដ្ឋរស់នៅឃុំដូង ស្រុករមាសហែក ថ្លែងមិនហ៊ានបញ្ចេញឈ្មោះបានប្រាប់អង្គភាពសារព័ត៌គេហទំព័រខ្មែរអច្ឆរិយ: យេីងឱ្យដឹងថា អាជ្ញាធរនៅតែអនុញ្ញាតឱ្យនាំជ្រូកចូលពីវៀតណាម តាមច្រករបៀងដូង លោកថាជារៀងរាល់យប់ និងថ្ងៃ រ៉ឺម៉កដឹកជ្រូករាប់សិបគ្រឿង ផ្ទុកជ្រូកពណ៌ក្រហមជាច្រើនក្បាលពីប្រទេសវៀតណាម មកលក់នៅប្រទេសកម្ពុជា។
ទាក់ទិនរឿងនេះដែរក្រសួងកសិកម្មនិងក្រសួងសុខាភិបាលកំពុងចាត់វិធានការរឿងនេះ ដោយតាមដានស្ថានភាពជំងឺផ្ដាសាយជ្រូកដែលអាចកើតមានឡើងនៅតំបន់ណាជាយថាហេតុ។ក្រសួងកសិកម្មកំពុងបង្ហាញសមត្ថភាពទប់ស្កាត់ ការនាំជ្រូកមានជំងឺពីប្រទេសវៀតណាមដែរ ហើយអាជ្ញាធរជំនាញបានផ្សព្វផ្សាយឱ្យពលរដ្ឋប្រុងប្រយ័ត្នក្នុងការបរិភោគសាច់ជ្រូក។
សូមបញ្ចាក់ថា នៅប្រទេសវៀតណាមជំងឺផ្ដាសាយជ្រូក បានកើតឡើងនៅខេត្តចំនួន ៩ ត្រឹមរយៈពេល ៤សប្ដាហ៍ចុងក្រោយនេះហើយអាជ្ញាធរវៀតណាមបានសម្លាប់ជ្រូកជាង ៤ពាន់ក្បាល (៤.២០០) ឬជិត ៣រយតោន (២៩៧)។
ប្រជាពលរដ្ធបានលេីកឡេីងថា វិធានការទប់ស្កាត់នាំចូលជ្រូកពីវៀតណាម របស់អាជ្ញាធរពាក់ព័ន្ធ គឺគ្មានប្រសិទ្ធភាពនោះទេ ហើយអាចនឹងកើនឡើងច្រើនជាងមុន នៅគ្រាដែលឈ្មួញបានប្ដូររូបភាពដឹកជញ្ជូនជ្រូកតាមរ៉ឺម៉ក ជំនួសដោយការដឹកតាមរថយន្តវិញម្ដង។ បញ្ហានេះ បេីមិនទប់ស្កាត់ការនាំជ្រូកចូលពីវៀតណាម បង្កផលប៉ះពាល់រយៈពេលវែងដល់សុខុមាលភាពប្រជាជន។
ប្រជាពលរដ្ឋបានលេីកឡេីងបន្ដថា ប្រសិនបើអាជ្ញាធរជំនាញនៅតែធ្វេសប្រហែស បណ្ដោយឱ្យនាំជ្រូកពីវៀតណាម ពលរដ្ឋនឹងជួបគ្រោះថ្នាក់ផ្នែកសុខភាព និងសេដ្ឋកិច្ច។ ច្រកព្រំដែនមិនត្រូវបានរឹតបន្តឹង និងអនុវត្តច្បាប់ឱ្យបានត្រឹមត្រូវទេសុខភាពប្រជាជននឹងប្រឈមហានិភ័យខ្ពស់ហើយរដ្ឋក៏ត្រូវចំណាយធនធានច្រើនដែរ។
ប្រជាពលរដ្ឋបានលេីកឡេីងបន្ដទៀតថាការអនុញ្ញាតឱ្យនាំជ្រូកមានជំងឺពីវៀតណាម មកកម្ពុជា មិនត្រឹមធ្វើឱ្យប៉ះពាល់សុខភាពប្រជាជនរយៈពេលវែង និងខាតប្រយោជន៍ជាតិធ្ងន់ធ្ងរនោះទេ អាជីវករលក់សាច់ជ្រូកនៅតាមទីផ្សារ និងពលរដ្ឋដែលចិញ្ចឹមជ្រូកលក្ខណៈកសិដ្ឋាន និងគ្រួសារ នឹងជួបការលំបាកផ្នែកសេដ្ឋកិច្ចធ្ងន់ធ្ងរ។ជុំវិញករណីនេះយេីងមិនអាចសុំការបំភ្លឺពីអធិការស្រុករមាសហែកលោក ចាប ណុល បានទេ។
ដោយ គេហទំព័រខ្មែរអច្ឆរិយៈ http://www.khpress.net