ហេតុការណ៍គ្រោះថ្នាក់ចរាចរណ៍ដ៏រន្ធត់មួយបង្កឡើងដោយបុរសម្នាក់បានបើករថយន្តមួយគ្រឿងម៉ាក លុចស៊ីស បុករះបងប្អូនប្រជាពលរដ្ឋបណ្តាលឲ្យមានមនុស្សរងរបួសធ្ងន់ ០៦នាក់ ដោយក្នុងនោះមាន ០២នាក់បានស្លាប់បាត់បង់ជីវិតនៅនឹងកន្លែង។
ករណីគ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោង ១១និង៣០នាទីព្រឹក ថ្ងៃទី២៨ ខែមីនា ឆ្នាំ២០១៩ ដែលស្ថិតនៅខាងក្រោយអធិការនគរបាលខណ្ឌទួលគោក ផ្លូវ៣២៤ ភូមិ៤ ក្រុម១៣ សង្កាត់បឹងសាឡាង ខណ្ឌទួលគោក រាជធានីភ្នំពេញ។ ជនបង្កមានឈ្មោះ ទឹម គឹមតិច អាយុ ៣៥ឆ្នាំ មុខរបរ ធ្វើសារធម៌ដូង ស្នាក់នៅផ្ទះលេខ២៥ ផ្លូវលេខ៣២៤ ភូមិ៤ ក្រុម១៣ សង្កាត់បឹងសាឡាង ខណ្ឌទួលគោក រាជធានីភ្នំពេញ។
ចំណែកឯជនរងគ្រោះដែលរងរបួសធ្ងន់មានឈ្មោះ ថា បញ្ញា (របួសធ្ងន់), ឈ្មោះ សំបូរ ដា (របួសធ្ងន់), ឈ្មោះ សំបូរ ទិត្យ (របួសធ្ងន់), ឈ្មោះ យាយ ហាន (របួសធ្ងន់) រីឯអ្នកស្លាប់ទាំង ០២នាក់មានឈ្មោះ យាយ យ៉ុម ភេទស្រី ស្លាប់នៅកន្លែង និងម្នាក់ទៀតឈ្មោះ ស៊ុយ សឿន ភេទប្រុស ស្លាប់ពេលបញ្ជូនដល់ពេទ្យ។
តាមប្រភពព័ត៌មានពីបងប្អូនប្រជាពលរដ្ឋ ដែលនៅកន្លែងកើតហេតុ បានប្រាប់ឲ្យដឹងថា មុនពេលកើតហេតុ បងប្អូនប្រជាពលរដ្ឋបាននាំគ្នារៀបចំធ្វើពិធីសែនលោកតារួច ក៏មានកម្មវិធីផឹកស៊ីតិចតួចជារៀងរាល់ឆ្នាំពេលនោះ បងប្អូនប្រជាពលរដ្ឋបានឃើញជនបង្ក រួចក៏បាននាំគ្នាហៅមកហូបអីជុំគ្នាតែជនបង្កមិនបានមកហូបអីនោះទេ ដោយបានអង្គុយនៅមុខផ្ទះរបស់ខ្លួន។ មួយស្ទុះ ក្រោយមក ជនបង្កបានដេីរចូលទៅក្នុងផ្ទះ លឺសំលេងឈ្លោះគ្នាប្រកែតគ្នា រួចជនបង្កក៏បានវាយកញ្ចក់ផ្ទះបែក ហេីយក៏ថយរថយន្តខាងលើចេញមកក្រៅ។
ភ្លាមៗនោះស្រាប់តែឃើញជនបង្កខាងលើ បានបើករថយន្ត មួយគ្រឿង ម៉ាក លុចស៊ីស RX300 ពណ៌ស្ករ ពាក់ស្លាកលេខ ភ្នំពេញ 2AN-2395 ក៏បានបើកទៅបុករះតែម្តង ដោយនៅខាងមុខនោះ គឺមានបងប្អូនប្រជាពលរដ្ឋដែលកំពុងអង្គុយហូបអីនៅទីនោះ បណ្តាលឲ្យមានមនុស្សជាច្រើននាក់បានរងរបួសធ្ងន់ ០៦នាក់ក្នុងនោះមាន២នាក់បានស្លាប់បាត់បង់ជីវិត។
ក្រោយពេលកើតហេតុ ជនបង្កបានព្យាយាមរត់គេចខ្លួន តែត្រូវបានកម្លាំងសមត្ថកិច្ចចេញមកអន្តរាគមន៍ឃាត់ខ្លូនបានជនបង្ក យកមកអធិការខណ្ឌទួលគោក និងបានទាក់ទងទៅសមត្ថកិច្ចជំនាញផ្នែកចរាចរណ៍ជើងគោក នៃស្នងការនរបាលរាជធានីភ្នំពេញ ដើម្បីចុះមកធ្វើការវាស់វែង និងយកជនបង្ក រួមទាំងរថយន្តទៅកាន់ការិយាល័យ ដើម្បីចាត់ការបន្តតាមនីតិវិធីច្បាប់៕
ដោយ គេហទំព័រខ្មែរអច្ឆរិយៈ http://www.khpress.net
