ភ្នំពេញ ៖
ថ្ងៃអង្គារ០៦រោជ ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៦ខែមីនា ឆ្នាំ២០១៩!
ប្រធានក្រុមប្រឹក្សាចៅក្រមជំនុំជម្រះនៃសាលាដំបូងរាជធានីភ្នំពេញ លោក តុប ឈុនហេង នៅរសៀល ថ្ងៃទី២៦ ខែមីនា ឆ្នាំ២០១៩នេះ បានប្រកាសសាលក្រមផ្ដន្ទាទោស លោក ថោង សារ៉ាត់ និងបក្ខពួកចំនួន០៤នាក់ ដាក់ពន្ធនាគារអស់មួយជីវិត ពាក់ព័ន្ធនឹងករណីឃាតកម្មសម្លាប់ ឧកញ៉ា អ៉ឹង ម៉េងជឺ។
ក្រុមឧក្រិដ្ឋជនទាំង០៥នាក់ដែលត្រូវផ្ដន្ទាទោសដាក់មួយជីវិតនោះ រួមមាន៖
ទី១-លោក ថោង សារ៉ាត់ ជាមេក្លោង
ទី២-ឈ្មោះ ស៊ាង វាសនា
ទី៣-ឈ្មោះ មាស សម្បត្តិ
ទី៤-ឈ្មោះ កុយ ចាន់ថុល
ទី៥-ឈ្មោះ ឈុំ ចិត្រា។
សម្រាប់ការប្រកាសសាលក្រមនេះក្រុមគ្រួសារសាច់ញាតិរបស់ក្រុមឧក្រិដ្ឋជនទាំង០៥នាក់នេះ កំពុងតែធ្វើការតវ៉ា និងបិទផ្លូវសាធារណៈនៅមុខសាលាដំបូងរាជធានីភ្នំពេញ ដោយសារពួកគេមិនសុខចិត្តចំពោះការសម្រេចរបស់តុលាការឡើយ។
ហេតុការណ៍បាញ់សម្លាប់លោកឧកញ៉ា អ៉ឹង ម៉េង ជឺ ដ៏កក្រើករាជធានីភ្នំពេញនេះបានកើតឡើងកាលវេលាម៉ោង៧និង១៨នាទីយប់ ថ្ងៃទី២២ ខែវិច្ឆិកា ឆ្នាំ២០១៤ ខណៈពេលលោកឧកញ៉ាចុះពីរថយន្ត ឡិចស៊ីស៥៧០ ដើម្បីទៅទិញផ្លែឈើនៅមុខហាងលក់ផ្លែឈើ ឡោ តិចសេង ស្ថិតនៅផ្លូវលេខ២៧៤ សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ។
មនុស្សយ៉ាងតិច១៤នាក់ ត្រូវបានសមត្ថកិច្ចនគរបាលព្រហ្មទណ្ឌរាជធានីភ្នំពេញឃាត់ខ្លួន ក្នុងនោះមានស្រី២នាក់ ករណីជាប់ពាក់ព័ន្ធឃាតកម្ម បាញ់សម្លាប់ឧកញ៉ា អ៊ឹង ម៉េងជឺ។ ចំណែកថោង សារ៉ាត់ ដែលសមត្ថកិច្ចអះអាងថា ជាមេខ្លោងនៃអំពើឃាត៕
ដោយ គេហទំព័រខ្មែរអច្ឆរិយៈ http://www.khpress.net