ភ្នំពេញ
ចេញផ្សាយថ្ងៃច័ន្ទ០៥រោជខែផល្គុនឆ្នាំចសំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ខែមីនា ឆ្នាំ២០១៩
នៅយប់រំលងអធ្រាត្រឈានចូលថ្ងៃទី២៥ខែមីនាឆ្នាំ២០១៩នេះសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបង្ហាញនូវសមានចិត្តរំលែកទុក្ខដល់គ្រួសារសពដែលត្រូវមន្ត្រីប៉ូលិសបាញ់សម្លាប់ជាមួយនឹងការសន្យាស្វែងរកយុត្តិធម៌ក្នុងរឿងនេះ។
នៅក្នុងផេកផ្លូវការរបស់សម្តេចក្រឡាហោមសខេងបានសរសេរថា ខ្ញុំមានការសោកស្តាយប្រកបដោយសមានទុក្ខដ៏ក្រៀមក្រំបំផុតក្រោយទទួលបានព័ត៌មានមកថា លោក ម៉ន វុធ បានទទួលមរណភាពក្នុងហេតុការណ៍ផ្ទុះអាវុធកាលពីម៉ោង២៣:០០នាទីយប់ថ្ងៃទី២៣ខែមីនាឆ្នាំ២០១៩ នៅចំណុចភូមិគោកសណ្ដែក ឃុំរក្សជ័យ ស្រុកបាភ្នំ ខេត្តព្រៃវែង។ខ្ញុំសូមចូលរួមរំលែកមរណទុក្ខ ដ៏ក្រៀមក្រំនេះជាមួយគ្រួសារសព និងសូមបួងសួងឲ្យវិញ្ញាណក្ខន្ធលោក ម៉ន វុធ បានទៅកាន់សុគតិភពកុំបីឃ្លៀងឃ្លាតឡើយ។
សម្តេចក្រឡាហោមសខេងបានបញ្ជាក់ថាក្នុងនាមក្រសួងមហាផ្ទៃខ្ញុំសន្យាថានឹងស្វែងរកយុត្តិធម៌ជូនគ្រួសារសពក៏ដូចជាក្រុមគ្រួសារដែលមានការពាក់ព័ន្ធ និងជូនសង្គមជាតិយើងទាំងមូល គួរបញ្ជាក់ផងដែរជនរងគ្រោះដល់ជីវិតក្នុងសកម្មភាពរងការបាញ់ប្រហារមិនញញើតដៃនិងអះអាងថាជាជនជាប់សង្ស័យឈ្មោះ ម៉ន រ៉ាវុធ ភេទប្រុសអាយុ៣២ឆ្នាំ មុខរបរជាងម៉ៅការសំណង់ មានស្រុកកំណើតនៅ ឃុំឈើកាច់ ស្រុកបាភ្នំ ខេត្តព្រៃវែងបច្ចុប្បន្នស្នាក់នៅ ខណ្ឌពោធិ៍សែនជ័យ រាជធានីភ្នំពេញ។
ចំណែកអ្នករួមដំណើរជាមួយជនសង្ស័យឈ្មោះ វ៉ាន ខេមរិន ភេទប្រុសអាយុ២៧ឆ្នាំ នៅភូមិឈើកាច់ ឃុំឈើកាច់ ស្រុកបាភ្នំ ខេត្តព្រៃវែង បានរងរបួសនិងត្រូវសមត្ថកិច្ចឃាត់ខ្លួន។
រឿងរ៉ាវមួយនេះបានកើតឡើងកាលពីម៉ោង១១យប់ថ្ងៃទី២៣មីនានៅចំណុចភូមិគោកសណ្តែក ឃុំរក្សជ័យស្រុកបាភ្នំ ខេត្តព្រៃវែងមានករណីសមត្ថកិច្ច ស្ទាក់បាញ់សម្លាប់ជនរងគ្រោះព្រោះច្រឡំថាជាចោរលួចរថយន្តទាំងជនរងគ្រោះគ្មានអាវុធក្នុងដៃ។
គិតត្រឹមរាត្រីថ្ងៃទី២៤ឈានចូល២៥ខែមីនានេះប៉ូលិសពីរនាក់ត្រូវបានឃាត់ខ្លួនឈ្មោះជឹម សាវិនជាមន្ត្រីនគរបាលនៅស្រុកព្រះស្ដេចត្រូវជាក្មួយលោកឧកញ៉ាជឹម សុខនិងម្នាក់ទៀតឈ្មោះជាឡាឌីន។
ចំណែកឈ្មោះជឹម រតនៈ អធិការរងស្រុកព្រះស្តេចទទួលផែនអន្តោប្រវេសន៍និងត្រូវជាកូនប្រុសលោកឧកញ៉ាជឹមសុខដែលមានការអះអាងថាជាជនដៃដល់ក្នុងសកម្មភាពបាញ់ប្រហារបានដឹងខ្លួនមុនកំពុងគេចខ្លួន។ប៉ូលិសកំពុងតាមប្រមាញ់ស្វែងរកចាប់ជនដៃដល់៕
ធ្វេីសេចក្ដីរាយការណ៍ពីរាជធានីភ្នំពេញដោយ គេហទំព័រខ្មែរអច្ឆរិយៈ http://www.khpress.net
