មណ្ឌលគិរី ៖ ដើម្បីការពារសុខសុវត្ថិភាពរបស់ប្រជាពលរដ្ឋ ជាពិសេស ក្នុងពេលយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ និតីកាលទី៦ នាពេលខាងមុខនេះ នាថ្ងៃព្រហស្បតិ៍ ៨រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៥ ខែកក្កដា ឆ្នាំ២០១៨នេះ កម្លាំងអធិការដ្ឋាននគរបាលក្រុងសែនមនោរម្យ ដឹកនាំដោយលោកវរសេនីយ៍ឯក កាន់ ពេញ អធិការនគរបាលក្រុងសែនមនោរម្យ បានរៀបចំកម្លាំងប្រចាំវេណ ដើម្បីការពារសុខ សុវត្ថិភាព សណ្តាប់ធ្នាប់ជូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ អន្តរជាតិ ដែលមកទស្សនាលំហែកាយនៅទឹកដីដ៏ស្រស់បំព្រង នៃខេត្តមណ្ឌលគិរី ឱ្យមានភាពកក់ក្តៅ និងគ្មានការភ័យក្លាច។
អធិការនគរបាលក្រុងសែនមនោរម្យ លោកវរសេនីយ៍ឯក កាន់ ពេញ បានឱ្យដឹងទៀតថា ការរៀបចំកម្លាំងប្រចាំវេណនេះ គឺកម្លាំងរបស់លោក បែកចែកជាពីរវេណ ក្នុងមួយវេណមានកម្លាំង១៤នាក់ ប្រចាំការ២៤ម៉ោង/២៤ម៉ោង ហើយក្នុងនោះដែរ កម្លាំងនគរបាល ក៏បានដើរល្បាតនៅចំណុចសំខាន់ៗ ក្នុងក្រុងសែនមនោរម្យ ដើម្បីធ្វើយ៉ាងណាការពារសុខសុវត្ថិភាពជូនពលរដ្ឋ ឱ្យបានល្អប្រសើរ។
ជាងនេះទៅទៀត លោកអធិការនគរបាលក្រុង បានអំពាវនាវដល់ប្រជាពលរដ្ឋទាំងអស់ ត្រូវចូលរួមសហការជាមួយសមត្ថកិច្ច ក្នុងករណីមានបញ្ហាដែលកើតឡើងនៅមូលដ្ឋាន ដើម្បីឱ្យសមត្ថកិច្ច បានចុះទប់ស្កាត់ និងដោះស្រាយបានទាន់ពេលវេលា៕