ភ្នំពេញ ៖
ចេញផ្សាយថ្ងៃអាទិត្យ ០៦កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១០ ខែកុម្ភៈ ឆ្នាំ២០១៩
ប្រជាពលរដ្ឋដែលជាអ្នកប្រើប្រាស់បណ្ដាញសង្គម Facebook បានសម្ដែងនូវការគាំទ្រយ៉ាងពេញទំហឹងចំពោះការសម្រេចរបស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ដែលបានស្នើថ្វាយព្រះមហាក្សត្រលុបឈ្មោះលោកឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្តរតនគិរី ចេញពីក្របខ័ណ្ឌនៃកងយោធពលខេមរភូមិន្ទ។
ការសម្រេចនេះត្រូវបានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា នេះគឺជាការវះកាត់ប្រកបដោយការឈឺចាប់ហើយនេះជាអភិក្រមទី៥ (គឺជាការវះកាត់)ដែលសម្តេចតេជោ បានដាក់ចេញសម្រាប់ការកំណែទម្រង់ស៊ីជម្រៅនៅក្នុងសកម្មភាពរបស់រាជរដ្ឋាភិបាលអាណត្តិថ្មីនេះដើម្បីពង្រឹងប្រសិទ្ធភាពការងារ។
ទន្ទឹមនឹងការសម្រេចមួយនេះ របស់សម្ដេចតេជោ ហ៊ុន សែន ត្រូវបានអ្នកប្រើប្រាស់បណ្ដាញសង្គមFacebookគ្រប់ប្រទាប់វណ្ណៈមានការសាទរយ៉ាងខ្លាំង ហើយពួកគេចាត់ទុកថា នេះជាមេរៀនមួយដ៏មានឥទ្ធិពលសម្រាប់ពញ្ញាក់ស្មារតីដល់មន្ដ្រីអ្នកអនុវត្តច្បាប់ទាំងឡាយដែលកំពុងតែកាន់តំណែងណាមួយសម្រាប់ប្រជាពលរដ្ឋនោះ។
តាមរយៈ Comment ក្នុង Facebook របស់សម្ដេចតេជោ ហ៊ុន សែន ដែលបានបង្ហោះអំពីការលុបឈ្មោះលោកឧត្តមសេនីយ៍មេបញ្ជាការអាវុធហត្ថខេត្តរតនគិរីនេះ គេសង្កេតឃើញថា មានការបញ្ចេញមតិយ៉ាងច្រើនជាបន្ដបន្ទាប់ហើយមានមតិមួយចំនួនស្នើឲ្យសម្ដេចពិនិត្យមើលមន្ដ្រីខិលខូចមួយចំនួនទៀតផងដែរ។
ប្រជារាស្ត្រទូទាំងប្រទេសបាទគាំទ្រសម្តេច១០០% សូមគោរពជូនពរសម្តេច សុខភាពល្អបរិបូរណ៍នេះជាសក្ខីកម្ម និងការអនុវត្តជាក់លាក់សូមគាំទ្រសម្តេចបន្តវះកាត់សាច់មិនល្អចេញបន្តទៀត ប្រជាពលរដ្ឋនឹងគាំទ្រកំណែទម្រង់ដ៏ជាក់លាក់នេះ។
ប្រជារាស្ត្របានលើកឡើងថា ក្នុងនាមជាប្រជាប្រជាពលរដ្ឋខ្មែរកូនចៅរបស់សម្តេច សូមគាំទ្រចំណាត់ការរបស់ សម្ដេចក្នុងការវះកាត់ករណីនេះ ហើយក៏ស្នើសុំសម្តេចបន្តវះកាត់សាច់ស្អុយបន្តទៀត បើសិនទុកខ្លាចបង្កទៅជាជំងឺមហារីករាលដាល។
បន្ថែមពីនេះពួកគាត់បានសរសេរថា (ពិតជាចំណាត់ការដែលសុក្រិត្យ យុត្តិធម៌ និងសមហេតុផលជាទីបំផុត ពិសេសចំពោះមន្ដ្រីដែលគ្មានក្រមសីលធម៌មួយចំនួន (តូច) ដែលធ្វើអ្វី ឬនិយាយអ្វី មិនដែលសូម្បីតែគិតពីកិត្តិសព្ទស្ថាប័ន និងប្រទេសជាតិ មិនតែប៉ុណ្ណោះយកឈ្មោះសម្តេច ជាល្បែងកំសាន្តអួតសប្បាយថែមទៀតគោរពជូនពរសម្តេច មានសុខភាពល្អ ដើម្បីបន្តបេសកកម្មសុខសន្តិភាព និងការអភិវឌ្ឍ។
ពួកគាត់បាននាំសម្ដែងទៀតថា សូមគោរពអរគុណសម្តេចដែលបានកាត់សាច់មិនបានការចោលចេញពីក្របខ័ណ្ឌដោយមិនទុករឺផ្លាស់ប្ដូរទៅខេត្តផ្សេងបានឡេីយ ក្នុងនាមខ្ញុំជាប្រជាពលទូទាំងប្រទេសត្រេកអរខ្លាំងណាស់ និងសូមជូនពរសម្តេច មានសុខភាពល្អ ជន្មាយុយឺនយូរ ដើម្បីដឹកនាំនាវាកម្ពុជាឆ្ពោះទៅកាន់ការអភិវឌ្ឍរីកចម្រើន និងសន្តិភាព។
សូមជម្រាបថា ការស្នើថ្វាយព្រះមហាក្សត្រ ដើម្បីលុបឈ្មោះលោក គឹម រស្មី ចេញពីក្របខ័ណ្ឌកងយោធពលខេមរភូមិន្ទ ពីសំណាក់សម្ដេចតេជោ ហ៊ុន សែន បានធ្វើឡើងបន្ទាប់ពី យប់ថ្ងៃទី០៥ ខែកុម្ភៈ ឆ្នាំ២០១៩កន្លង លោក គឹម រស្មី នៅក្នុងពិធីខួបកំណើតបានប្រកាសនៅលើវេទិកា ចែកប្រាក់ដល់កូនៗចំនួន៥នាក់ដោយម្នាក់ៗទទួលបាន១០ម៉ឺនដុល្លារ សរុប៥០ម៉ឺនដុល្លារ។
ដោយគេហទំព័រខ្មែរអច្ឆរិយ: http://www.khpress.net