រដ្ឌធានីហាយណូយ
ចេញផ្សាយថ្ងៃសុក្រ ០៤កើត ខែមាឃ ឆ្នាំច សំរឹទ្ទិស័ក ព.ស.២៥៦២ ត្រូវនឹងថ្ងៃទី ០៨ ខែកុម្ភៈ ឆ្នាំ ២០១៩
ដោយ : លោក វង្ស ច័ន្ទសម័យ
គម្រោងជំនួបកំពូលលើកទី២ រវាងលោកប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើងលោកគីម ជុងអ៊ុន និងរៀបចំធ្វើនៅថ្ងៃទី២៧ និង ២៨ កុម្ភៈក្នុងប្រទេសវៀតណាម។ ព័ត៌មានមួយនេះត្រូវបានប្រកាសជាផ្លូវការដោយលោកត្រាំនាឱកាសថ្លែងសុន្ទកថាទៅកាន់ប្រជាជាតិនាថ្ងៃអង្គារ ទី០៥ កុម្ភៈ។
លោកអ៊ូច ទែរត្រេ (Hugues Tertrais) សាស្ត្រាចារ្យវិទ្យាសាស្ត្រនយោបាយបារាំងម្នាក់ក្នុងទីក្រុងប៉ារីសបានមើលឃើញការដែលអាមេរិកជ្រើសយកវៀតណាមដើម្បីរៀបចំជំនួបកំពូលត្រាំ គីមពេលនេះជាជម្រើសនយោបាយព្រោះអាមេរិកសំឡឹងឃើញវៀតណាមជាសម្ព័ន្ធមិត្តប្រឆាំងចិន។« ការបែរងាករបស់សហរដ្ឋអាមេរិកទៅរកវៀតណាមទទួលបានជោគជ័យ ហើយវៀតណាមពិតជាយល់មិនច្រឡំទេថា ខ្លួននឹងអាចពឹងពាក់សហរដ្ឋអាមេរិកឲ្យជួយដោះស្រាយបញ្ហាជម្លោះនៅសមុទ្រចិនខាងត្បូងបាន។ ប្រទេសវៀតណាម និងប្រទេសកូរ៉េធ្លាប់មានប្រវត្តិយូរលង់ជាមួយចិន។ វៀតណាម និងកូរ៉េជាប្រទេសពីរដែលធ្លាប់ស្ថិតក្រោមឥទ្ធិពលរបស់ចិន ហើយចិនពិតជាមិនអាចបំភ្លេចបានឡើយ។
វៀតណាម និងកូរ៉េបានស្ថិតក្រោមឥទ្ធិពលរបស់ចិនយ៉ាងយូរ តែតាំងពីពេលនោះមក អ្វីៗបានប្រែប្រួលអស់ហើយ។ បន្ទាប់មកគេអាចនិយាយបានថា វៀតណាម និងកូរ៉េមានប្រវត្តិសង្គ្រាមស្រដៀងគ្នាដែលជាប់ពាក់ព័ន្ធជាមួយសហរដ្ឋអាមេរិក។ សង្គ្រាមវៀតណាមរវាងវៀតណាមខាងជើង និងវៀតណាមខាងត្បូង តែបានបិទបញ្ចប់រួមជាវៀតណាមតែមួយ។ ចំណែកសង្គ្រាមកូរ៉េក៏ជាសង្គ្រាមរវាងកូរ៉េខាងជើង និងកូរ៉េខាងត្បូង តែបានបិទបញ្ចប់ជាមួយនឹងការពុះចែកកូរ៉េជាពីរមកដល់សព្វថ្ងៃ។ដូច្នេះខ្ញុំយល់ឃើញថា កូរ៉េខាងជើងអាចទទួលបានប្រយោជន៍ពីការរំកិលរកវៀតណាមតែនៅក្នុងករណីណាដែលកូរ៉េខាងជើងស្វែងរកការអភិវឌ្ឍន៍សេដ្ឋកិច្ច និងការបើកចំហសេដ្ឋកិច្ចជាមួយអាស៊ី និងជាមួយពិភពលោក។ ខ្ញុំមិនដឹងថា តើវៀតណាមអាចជាគំរូសម្រាប់កូរ៉េខាងជើងឬអត់ទេ តែបទពិសោធន៍របស់វៀតណាមអាចជាគំនិតមួយសម្រាប់កូរ៉េខាងជើង »៕
ដោយ: គេហទំព័រ ខ្មែរអច្ឆរិយ:http://www.khpress.net