ខេត្តក្រចេះ ៖
ចេញផ្សាយ១៥រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៤ ខែកុម្ភៈ ឆ្នាំ២០១៩
ហេតុតការណ៍នេះបានកេីតឡេីងនៅវេលាម៉ោង០០និង១០នាទីថ្ងៃទី០៣ ខែកុម្ភឆ្នាំ២០១៩ឈានចូលថ្ងៃទី០៤ ខែកុម្ភៈ ឆ្នាំ២០១៩ត្រង់ចំណុផ្លូវកែង៨៨ ភូមិជើងឃ្លេ ឃុំ២ធ្នូ ស្រុកស្នួល ខេត្តក្រចេះ។ ប្រភពពីសមត្ថកិច្ចបានឱ្យដឹងថាជនរងគ្រោះឈ្មោះ ស៊ន សិទ្ធី ភេទប្រុសអាយុ១៨ឆ្នាំស្នាក់នៅឃុំស្នួល ស្រុកស្នួលខេត្តក្រចេះ មុខរបរភ្នាក់ងារព័ត៌មានអង្គភាពគេហទំពរ័(បាត់ដំបងប៉ុស្តិ៍)។
តាមប្រភពពីកន្លែងកើតហេតុបានឱ្យដឹងថា នៅមុនពេលកើតហេតុជនរងគ្រោះមានគ្នា០៣នាក់នាំគ្នាជិះម៉ូតូទៅរាំលេងធុងបាស់នៅចំណុចគីឡូ៩០ ភូមិជើងឃ្លេ ឃុំ២ធ្នូ ស្រុកស្នួល ពេលត្រឡប់មកផ្ទះវិញពួកគេបានជិះម៉ូតូ ឌុបគ្នា០៣នាក់មានឈ្មោះ នី ធីរ៉ា ជាអ្នកបើកបរម៉ូតូ និងឈ្មោះ ប៉ែ នៅកណ្ដាល ចំណែកជនរងគ្រោះដែលស្លាប់ឈ្មោះ ស៊ន សិទ្ធី ជិះនៅពីក្រោយគេ។ លុះមកដល់កន្លែងកើតហេតុ ស្រាប់តែលេចមុខក្រុមជនដៃដល់មួយក្រុម ស្ទាក់ចាំវាយហើយយកដុំថ្មមកគុបទៅលើជនរងគ្រោះចំក្បាលខាងក្រោយធ្លាក់ពីលើម៉ូតូរួចក៏នាំគ្នាព្រួតវាយរហូតដល់ស្លាប់នៅកន្លែងតែម្ដង។ក្រោយកើតហេតុក្រុមជនដៃដល់បានរត់គេចខ្លួនបាត់ស្រម៉ោលអស់ភ្លាមៗដែរ។
ខណៈពេលនោះ គេឃើញជនរងគ្រោះដេកស្លាប់នៅចិញ្ចើមផ្លូវជាប់គម្ពោតព្រៃក្បែរនោះក្រោយកើតហេតុសមត្ថកិច្ចក៏បានចុះពិនិត្យដល់កន្លែងកើតហេតុ ហើយបានប្រគល់សាកសពឱ្យសាចញ្ញាតិនិងក្រុមគ្រួសារយកទៅធ្វើបុណ្យតាមប្រពៃណីផងដែរ។
បើតាមប្រភពព័ត៌មានពីអ្នកស្និទជាមួយសាកសពបាបបង្ហើបឲ្យដឹងថា ការស្លាប់របស់ភ្នាក់ងារកាសែតខាងលើប្រហែលជាមានអាថកំបាំងក្នុងបញ្ហាបទល្មើសព្រៃឈើ សូមឲ្យសមត្ថកិច្ចជួយស្រាវជ្រាវករណីនេះឲ្យបានម៉ត់ចត់ផងដេីម្បីវែកមុខជនដៃដល់យកមកផ្ដន្ទាទោសផង។
បច្ចុប្បន្ន សមត្ថកិច្ចកំពុងតែបន្តស្រាវជ្រាវតាមចាប់ក្រុមជនសង្ស័យទាំងនោះយកមកផ្ដន្ទាទោសទៅតាមផ្លូវច្បាប់ ៕
ដោយគេហទំព័រ ខ្មែរអច្ឆរិយៈ(http://www.khpress.net)