ចេញផ្សាយថ្ងៃ សុក្រ១២ រោច ខែ បុស្ស ឆ្នាំច សំរឹទ្ទិស័ក ព.ស. ២៥៦២ ត្រូវនឹងថ្ងៃទី០១ ខែកុម្ភៈ ឆ្នាំ ២០១៩
ដោយ: វង្ស ចាន់យុគ្គសម័យ
រដ្ឌធានីការ៉ាកាស ៖ លោកប្រធានាធិបតី នីកូឡា ម៉ាឌូរ៉ូ នៃប្រទេស វេណេស៊ុយអេឡាកំពុងដឹកនាំមុខកងយោធាដែលបន្ស្មោះត្រង់នឹងលោកបើទោះបីស្ថានការណ៍នយោបាយនៃ ប្រទេសអាមេរិកឡាទីន មួយនេះកំពុងជួបវិបត្តិនយោបាយយ៉ាងធ្ងន់ធ្ងរយ៉ាងណាក៏ដោយ។សូបញ្ចាក់ថានៅប្រទេសវ៉េណេស៊ុយអេឡាដែលកំពុងតែមានបាតុកម្ម រំជើបរំជួលប្រឆាំងនឹងរដ្ឋាភិបាលលោកនីកូឡា ម៉ាឌូរ៉ូនោះ មានអ្នកកសែតបរទេសជាច្រើនអ្នក ដែលត្រូវបានអាជ្ញាធររដ្ឋាភិបាលនេះចាប់ឃុំខ្លួន និងធ្វើការ បណ្តេញ ចេញពីប្រទេស។ដំណឹងចុងក្រោយ ដែលទើបទទួលបាន គឺមានអ្នកកាសែតបារាំងចំនួន ០២ នាក់ និងក្រុមការងារ អ្នកកាសែអេស្ប៉ាញ៤នាក់ កំពុងស្ថិតក្នុងការឃុំខ្លួនចំណែកអ្នកកាសែតឈីលី ២នាក់ត្រូវបានបណ្តេញចេញពីប្រទេសក្រោយឃុំខ្លួនបានប៉ុន្មានម៉ោង។
អ្នកកាសែតបារាំង២នាក់ ឈ្មោះ Pierre Caillé និង Baptiste des Monstiers ដែលធ្វើការឲ្យស្ថានីយទូរទស្សន៍TMC របស់បារាំង ត្រូវបានកងអង្គរក្សលោក ប្រធានាធិបតីនី កូឡា ម៉ាឌូរ៉ូ ចាប់ឃាត់ខ្លួន កាលពីថ្ងៃអង្គារទី ២៩ខែមករា។ យោងតាមសហជីពអ្នកកាសែតវ៉េណេស៊ុយអេឡា SNTP បានឲ្យដឹងថា អ្នកកាសែតបារាំងទាំង២នាក់ព្រមទាំងផលិតករជនជាតិវ៉េណេស៊ុយអេឡាម្នាក់ផងត្រូវគេចាប់ខ្លួន ក្នុងពេលដែលពួកគេ កំពុងថតនៅក្បែរ បរិវេណវិមាន ប្រធានាធិបតី។ រហូតមកទល់ពេលនេះគេនៅពុំទាន់ មានដំណឹងអ្វីទាំងអស់ទាក់ទិននឹងទីតាំងក៏ដូចជា ស្ថានភាពនៃការឃុំខ្លួននេះ។
ដោយឡែក អ្នកកាសែតជនជាតិឈីលី០២នាក់ និងអ្នកកាសែតជនជាតិវ៉េណេស៊ុយអេឡា០២នាក់ ក៏ត្រូវបានកងសន្តិសុខប្រធានាធិបតីនីកូឡាម៉ាឌូរ៉ូចាប់ខ្លួនដែរ កាលពីថ្ងៃអង្គារទី២៩មករា។ ក្រោយឃុំខ្លួនបានប្រមាណ១៤ម៉ោង កងសន្តិសុខ បានដោះលែងអ្នកកាសែតទាំង៤នាក់មកវិញ ប៉ុន្តែអ្នកកាសែតជនជាតិ ឈីលីត្រូវបានគេបណ្តេញចេញពីវ៉េណេស៊ុយអេឡា។
ក្រៅពីនេះបើតាមប្រភេពពីក្រសួងការបរទេស អេស្ប៉ាញបានឲ្យដឹងថាក្រុមការងារមួយក្រុម របស់ ទីភ្នាក់ងារព័ត៌មានអេស្ប៉ាញ EFE ត្រូវបានគេចាប់ឃាត់ខ្លួននៅថ្ងៃពុធទី៣០មករា។ ក្នុងក្រុមការងារនោះ មានអ្នកកាសែត ជនជាតិអេស្ប៉ាញ៤នាក់ អ្នកថតរូបជនជាតិកូឡុំប៊ីម្នាក់និងអ្នកថតវីដេអូជនជាតិកូឡុំប៊ី ម្នាក់ទៀត។ រដ្ឋាភិបាលអេស្ប៉ាញ បានអំពាវនាវ តាមរយៈលិខិតចុះថ្ងៃទី៣១មករានេះ ឲ្យរដ្ឋាភិបាលវ៉េណេស៊ុយអេឡាគោរពសិទ្ធិសេរីភាពសារព័ត៌មាន និង ត្រូវដោះលែងអ្នកកាសែតជាបន្ទាន់។
គួរកត់សំគាល់ថា នៅរវាងប៉ុន្មានខែ ដែលមានសកម្មភាពតវ៉ាប្រឆាំងនឹងរដ្ឋាភិបាលលោក ម៉ាឌូរ៉ូ នេះ អ្នកកាសែត មិនថាជនជាតិវ៉េណេស៊ុយអេឡា ឬ បរទេសទេ បានទទួលរងនូវការធ្វើទុកបុកម្នេះជាច្រើន។ អង្គការ Reporters sans frontières បានអំពាវនាវកាលពីថ្ងៃអង្គារទី២៩មករាឲ្យរដ្ឋាភិបាលវ៉េណេស៊ុយឡាត្រូវតែធានាឲ្យបាន នូវការគោរពសិទ្ធិសេរីភាពសារព័ត៌មាន ហើយត្រូវបញ្ឈប់នូវសកម្មភាពហិង្សា រារាំងការងាររបស់អ្នកកាសែតជាតិនិងអន្តរជាតិព្រមទាំងសកម្មភាពដកហូតសម្ភារៈបំពេញការងារដូចជាម៉ាស៊ីនថតទូរស័ព្ទដៃ ជាដើម។ល។
យ៉ាងណាមិញ លោក Juan Guaido ប្រធានសភា និងជាមេក្រុមប្រឆាំងនឹងរដ្ឋាភិបាលលោកនីកូឡា ម៉ាឌូរ៉ូ បានសរសេរ នៅលើទំព័រTwitter នៅថ្ងៃទី៣១មករានេះថា “រដ្ឋាភិបាលផ្តាច់ការរបស់នីកូឡា ម៉ាឌូរ៉ូ មិនអាចលាក់បាំងពិភពលោក នូវទង្វើអាក្រក់របស់ខ្លួន ដែលបានធ្វើទៅលើប្រជាជនវ៉េណេស៊ុយអេឡាទេ”។ លោកសរសេរបន្ថែមថា “ក្នុងពេលឆាប់ៗខាងមុខ សេរីភាពបញ្ចេញមតិ និងសេរីភាពសារព័ត៌មាន ត្រូវតែស្តារឡើងវិញឲ្យបានពេញបរិបូរណ៍នៅវ៉េណេស៊ុយអេឡា”៕
ដោយះ គេហទំព័រ ” ខ្មែរអច្ឆរិយៈ ”
https://www.khpress.net
