ខេត្តមណ្ឌលគិរី ៖
ចេញផ្សាយថ្ងៃអង្គារ ០៩រោជ ខែបុស្ស ឆ្នាំច សំរឹទ្ធិស័កព.ស.២៥៦២ ត្រូវនឹងថ្ងៃទី២៩ ខែមករា ឆ្នាំ២០១៩
លោក កែវ សុគ៌គ បានឱ្យដឹងថា នៅវេលាម៉ោង៣និង៣០នាទីទៀបភ្លឺថ្ងៃទី២៩ ខែមករា ឆ្នាំ២០១៩ មានករណីផ្ទុះអាវុធជាច្រើនគ្រាប់ រវាងក្រុមអ្នកប្រមាញ់សត្វព្រៃបណ្តាលឱ្យមន្ត្រីឧទ្យានុរក្សម្នាក់រងរបួសធ្ងន់ នៅតំបន់ការពារសត្វព្រៃស្រែពក ចំណុចត្រពាំងកកោះ ភូមិជីមៀត ឃុំណងឃីលឹក ស្រុកកោះញែក ខេត្តមណ្ឌលគិរី។
លោកបានបញ្ជាក់ទៀតថា មូលហេតុឈានដល់ការផ្ទុះអាវុធនេះ ក្រុមមន្ត្រីឧទ្យានុរក្សចំនួន០៦នាក់ និងមានកាំភ្លើងAK ២ដើមបានដើរល្បាតស្វែងរបទល្មើសនានានៅចំណុចខាងលើ ក៏បានជួបប្រទះជាមួយក្រុមអ្នកប្រមាញ់សត្វព្រៃ ដែលធ្វើសកម្មភាពបរបាញ់សត្វព្រៃហើយបានឃាត់សួរនាំ តែដោយសារជនបង្កមានគ្នាប្រមាណជា៥-៦នាក់ និងមានអាវុធទៀតនោះ ក៏បានផ្ទុះអាវុធដាក់គ្នាទៅវិញទៅមកបណ្តាលឱ្យមន្ត្រីឧទ្យានុរក្សម្នាក់ឈ្មោះ ចេង ចន្ធី ភេទប្រុស អាយុប្រហែល៣០ឆ្នាំ បានរងរបួសធ្ងន់ត្រង់ភ្លៅ ហើយក្រុមមន្ត្រីឧទ្យានរក្សបានដកថយទៅជំរំ វិញ លុះដល់ម៉ោង៥ព្រលឹមនោះដែរ ក្រុមអ្នកប្រមាញ់សត្វព្រៃ ក៏បានទៅជំរំមន្ត្រីឧទ្យានុរក្ស ហើយក៏បានបាញ់រះចំម៉ូតូមន្ត្រីឧទ្យានរក្ស រួចគេចខ្លួនបាត់ ចំណែកឯជនរងគ្រោះក៏ត្រូវបានក្រុមការងារជួយសង្គ្រោះបញ្ចូនទៅមន្ទីរពេទ្យកាល់ម៉ែតរាជធានីភ្នំពេញ។
ឧត្តមសេនីយ៍ត្រី សូ សុវណ្ណ ស្នងការរងនគរបាលខេត្តមណ្ឌលគិរី បានឱ្យដឹងនៅវេលាម៉ោង៥ រសៀលថ្ងៃទី២៩ ខែមករានេះ ចំពោះករណីផ្ទុះអាវុធខាងលើនេះ លោក បានដាក់កម្លាំង ចុះទៅធ្វើការត្រួតពិនិត្យ និងស្រាវជ្រាវនៅកន្លែងកើតហេតុ ដើម្បីប្រមូលវត្ថុតាង តែនៅតំបន់នោះ មិនមានសេវាសម្រាប់ទាក់ទងគ្នានោះទេ ហើយរហូតមកដល់ពេលនេះកម្លាំងរបស់លោក នៅមិនទាន់ត្រលប់មកវិញនៅឡើយទេ។
ដូច្នេះ លោកស្នងការរងនគរបាលខេត្ត មិនទាន់សន្និដ្ឋានបាននៅឡើយទេ រង់ចាំកម្លាំងជំនាញចេញពីក្នុងព្រៃសិន៕ (ដោយសារព័ត៌មាននិងគេហទំព័រ”ខ្មែរអច្ឆរិយ:)http://www.khpress.net