ភ្នំពេញ ៖
ចេញផ្សាយថ្ងៃអាទិត្យ ១៥កើត ខែបុស្ស ឆ្នាំច សំរឹទិ្ធស័ក ព.ស២៥៦២ ត្រូវថ្ងៃទី២០ ខែមករា ឆ្នាំ២០១៩ !!!
ក្នុងពេលទទួលជួបសំណេះសំណាលជាមួយនិស្សិតកម្ពុជាចំនួន១៨រូបដែលទទួលបានអាហាររូប្បករណ៍ទៅសិក្សានៅប្រទេសណូវែលសេឡង់ (New Zealand) នាទីស្តីការក្រសួងបរិស្ថាន កាលពីថ្ងៃទី១៨ ខែមករា ឆ្នាំ២០១៩ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថានមានប្រសាសន៍ថា ជាយុវជនត្រូវធ្វើកិច្ចការរបស់ខ្លួនឲ្យបានល្អ កុំបែកបាក់សាមគ្គីជួយយកអាសារគ្នាស្គាល់ពីតួនាទីខ្លួនឯងត្រូវចេះរៀនភាសាបរទេស និងធ្វើទំនើបកម្មខ្លួនឯងឲ្យបានជាប់ជាប្រចាំ។
ឯកឧត្តមបានលើកទឹកចិត្តឲ្យយុវជនខិតខំរៀនសូត្រ ហើយត្រូវចេះរក្សានូវកិត្តិយសជាតិ អត្តសញ្ញាណជាតិ និងត្រូវចេះចែករំលែកសក្តានុពលរបស់កម្ពុជាបង្ហាញពីអ្វីដែលកម្ពុជាសម្រេចបានដោយលំបាក ដូចជាសន្តិភាពដែលជំរុញកំណើនសេដ្ឋកិច្ចរង្វង់៧% ជារៀងរាល់ឆ្នាំ ស្ថេរភាពនយោបាយនិងការរីកចំរើននៃសេរីភាពក្នុងការជាដើមក្នុងនាមជាអ្នកតំណាងយុវជនប្រទេសកម្ពជាលើឆាកអន្តរជាតិ
ជាមួយគ្នានេះដែរ ឯកឧត្តមរដ្ឋមន្ត្រីបន្ថែមថា យុវជនត្រូវស្វែងយល់ពីរបៀបរបបរស់នៅការរៀបចំសង្គមជាតិរបស់គេ និងធ្វើការដកបទពិសោធន៍មកអភិវឌ្ឍខ្លួនឯងក្រុមគ្រួសារនិងអភិវឌ្ឍសង្គមជាតិ។
សូមបញ្ជាក់ថា ក្នុងជំនួបជាមួយយុវជនអាហាររូប្បករណ៍ ទៅសិក្សានៅប្រទេសណូវែលសេឡង់ ឯកឧត្តម សាយ សំអាល់ បានចែករំលែកបទពិសោធន៍ការងារក្នុងក្របខណ្ឌជាមន្ត្រីរាជការ ការធ្វើទំនើបកម្មស្ថាប័ន សមិទ្ធផលការងារសម្រេចបានក្នុងអាណត្តិកន្លងទៅ និងការរៀបចំរដ្ឋបាលទំនើបរបស់ក្រសួងបរិស្ថាននៅក្នុងផែនការយុទ្ធសាស្ត្រនៃក្រសួងបរិស្ថានផងដែរ៕
(ដោយសារព័ត៌មាន និងគេហទំព័រខ្មែរអច្ឆរិយ) http://wwwkhpress.net