ខេត្តដាក់ឡាក់: នាថ្ងៃទី០៣ ខែកក្កដា ឆ្នាំ២០១៨នេះ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី រួមទាំងលោកស្នងការរង និងមន្ត្រីក្រោមឱវាទ បានអញ្ជើញចុះសួរសុខទុក្ខ លោកវរសេនីយ៍ត្រី តាត់ យ៉េន អធិការនគរបាលស្រុកពេជ្រាដា ដែលកំពុងសម្រាកព្យាបាលនៅមន្ទីរពេទ្យខេត្តដាក់ឡាក់ នៃសាធារណៈរដ្ឋសង្គមនិយមវៀតណាម គ្រាដែលលោកបានរងរបួសដៃស្តាំ ពេលឆ្មក់ចូលបង្ក្រាបការជួញដូរគ្រឿងញៀននៅមូលដ្ឋានរបស់លោកផ្ទាល់ កាលពីថ្ងៃទី២៦ ខែមិថុនា ឆ្នាំ២០១៨។
លោកស្នងការនគរបាលខេត្ត បានពាំនាំការសួរសុខទុក្ខពីសំណាក់ឯកឧត្តម អភិបាលខេត្តមណ្ឌលគិរី និងមន្ត្រីនគរបាលទាំងអស់ ។ លោកស្នងការ បានលើកទឹកចិត្តដល់លោកអធិការស្រុកពេជ្រាដា ត្រូវថែទាំសុខភាព និងត្រូវពិសាថ្នាំអោយបានទៀងទាត់តាមវេជ្ជបញ្ជាពេទ្យ ជាពិសេស ក៏សូមជូនពរអោយលោកអធិការ និងលោក នាយការិយាល័យប្រឆាំងភេវកម្ម និងឧក្រិដ្ឋកម្មឆ្លងដែន ឆាប់ជាសះស្បើយ ដើម្បីវិលត្រលប់ទៅបម្រើការងារនៅក្នុងអង្គភាពវិញ។
នាឱកាសនោះដែរ លោកស្នងការនគរបាលខេត្ត បាននាំយកថវិកាឯកឧត្តម ស្វាយ សំអ៊ាង អភិបាលខេត្តចំនួន២លានរៀល រួមទាំងថវិកាលោកស្នងការផ្ទាល់ចំនួន៥០០$ ក៏ដូចជាមន្ត្រីក្រោមឱវាទចំនួន២៥០$ និង៦៥០០០ម៉ឺនរៀល ផ្តល់ជូនលោកវរសេនីយ៍ត្រី តាត់ យ៉េន អធិការនគរបាលស្រុកពេជ្រាដា និងលោកវរសេនីយ៍ទោ បឹង ដែង នាយការិយាល័យប្រឆាំងភេវកម្ម និងឧក្រិដ្ឋកម្មឆ្លងដែន ដែលកំពុងសម្រាកព្យាបាលនៅខេត្ត ប្រទេសវៀតណាម។
សូមបញ្ជាក់ថា លោកអធិការនគរបាលស្រុកពេជ្រាដា បានចូលទៅបង្ក្រាបឈ្មួញទុច្ចរិតជួញដូរគ្រឿងញៀន ក្នុងមូលដ្ឋានរបស់លោក នៅវេលាម៉ោង៩យប់ថ្ងៃទី២៦ មិថុនា ២០១៨ ភូមិពូលុ ឃុំប៊ូស្រា ស្រុកពេជ្រាដា ខេត្តមណ្ឌលគិរី ។ហើយត្រូវបានជនសង្ស័យតដៃបណ្តាលឲ្យលោកអធិការស្រុកពេជ្រា រងរបួសដៃខាងស្តាំ ចំណែកជនសង្ស័យម្នាក់ត្រូវសមត្ថកិច្ចបាញ់បាក់ភ្លៅម្ខាងផងដែរ៕
