ភ្នំពេញ ៖
ចេញផ្សាយថ្ងៃសៅរ៍ ០៧ កើត ខែបុស្ស ឆ្នាំច សំរឹទ្ធិស័កព.ស.២៥៦២ ត្រូវនឹងថ្ងៃទី១២ ខែមករា ឆ្នាំ២០១៩!
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញផ្តល់កិត្តិយសជួបសំណេះសំណាលនិងពិសារអាហារសាមគ្គី ជាមួយពួកអ្នកព័ត៌មានក្នុងស្រុកប្រមាណ ៤៥០០នាក់ ដែលមកពីស្ថាប័នផ្សេងៗរួមទាំងថ្នាក់ដឹកនាំនិងមន្ត្រីក្រសួងព័ត៌មាន ស្ថានីយវិទ្យុ ទូរទស្សន៍ សារព័ត៌មានបោះពុម្ពផ្សាយ ក្រុមសារព័ត៌មានផ្សាយតាមបណ្តាញសង្គម Facebook, គេហ ទំព័រ និង TV Online អ្នកនាំពាក្យក្រសួង ស្ថាប័ន អ្នកនាំពាក្យរាជធានី ខេត្ត និងមន្ទីរព័ត៌មានរាជធានីខេត្ត ដែលបានធ្វើឡើងនៅមជ្ឈមណ្ឌលកោះពេជ្រ ។
សម្តេចតេជោ មានសោមនស្សសប្បាយរីករាយយ៉ាងខ្លាំង ដែលបានអញ្ជើញមកជួបជុំសំណេះសំណាលនិងពិសារអាហារសាមគ្គីជាមួយបងប្អូនកូនក្មួយ អ្នកសារព័ត៌មានជាតិយើងនៅក្នុងជំនួបជាលើកទី៣ប្រចាំឆ្នាំ២០១៩ក្នុងនាមជានាយករដ្ឋមន្ត្រី សម្តេចតេជោ ហ៊ុន សែន តែងតែផ្សារភ្ជាប់នូវទំនាក់ទំនងល្អៗជាមួយពលរដ្ឋ អង្គការ និង សមាគមន៍នានាតាមរយៈ កម្មវិធីជួបជុំដូចល្ងាចនេះដែលពេលកន្លងមកគឺមានកម្មវិធីជួបជុំផ្សេងៗដូចជាបងប្អូនខ្មែរឥស្លាម បងប្អូនខ្មែរ-ចិន, បងប្អូនគ្រឹះសាសនា,ក្មួយៗសិល្បៈករ សិល្បៈការិនី, បងប្អូន កូនក្មួយ កីឡាក រកីឡាការិនី និងការជួបជុំជាមួយបងប្អូនកូនក្មួយអ្នកសារព័ត៌មានជាដើម។
គោលបំណងនៃការជួបជុំនេះគឺដើម្បីស្វែងយល់អំពីសុខទុក្ខផ្ទាល់របស់បងប្អូនមិត្តអ្នកសារព័ត៌មានជាតិយើង និងបានផ្តល់នូវអនុសាសន៍ល្អៗដើម្បីជំរុញឱ្យការផ្សព្វផ្សាយព័ត៌មានអោយបានល្អពិតត្រឹមត្រូវពិតប្រាកដតាមក្រមសីលធម៌ច្បាស់លាស់ដើម្បីបំរើសង្គមជាតិឲ្យកាន់តែរីកចម្រើនតទៅអនាគតនៅថ្ងៃនេះផងដែរសម្តេចតេជោនាយរកដ្ឋមន្ត្រីបានប្រកាសឲ្យអ្នកសារព័ត៌មានជាតិយើងនិងប្រជាពលរដ្ឋបានដឹងថា សម្តេចតេជោ បានសម្រេចបញ្ចប់រឿងរ៉ាវមួយដ៏សំខាន់ជាមួយរដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ គឺចាប់ពីពេលនេះតទៅនៅតាមច្រកទ្វារព្រំដែនទាំងអស់គឺមិនឲ្យមានផ្នែកណាផ្សេងក្រៅតែពី “នគរបាលអន្តោប្រវេសន៍ និងគយ “ តែប៉ុណ្ណោះភ្នាក់ងារដ៏ទៃៗទទៀត រួមទាំងកាំកុងត្រូល គឺត្រូវដកចេញអោយអស់។
ទន្ទឹមនឹងនោះក៏ត្រូវបញ្ចុះតម្លៃស្កែន (Scan) ទំនិញផងដែរដើម្បីអោយអ្នករកស៊ីទទួលបានផលចំណែញកាន់តែច្រើនសម្តេចតេ ជោ នាយករដ្ឋមន្ត្រី បានបញ្ជាក់ច្បាស់ថា ការអនុវត្តបែបនេះគឺដើម្បីចូលរួមចំណែកក្នុងការលុបបំបាត់ភាពអសកម្មផ្សេងៗនិងអំពើរពុករលួយជាដើមនិងម្យ៉ាងវិញទៀតគឺបានបានបង្ករលក្ខណៈកាន់តែងាយស្រួលដល់ពាណិជ្ជករ និងបងប្អូនប្រជាពលរដ្ឋក្នុងការប្រកបអាជីវកម្មផងដែរ ទន្ទឹមនិងនេះគឺនឹងជួយអោយសេដ្ឋកិច្ចជាតិមានដង្ហើមរស់បានដោយស្រួលថែមទៀតផង ។
នៅក្នុងឱកាសនេះផងដែរ សម្តេចតេជោ ហ៊ុន សែន បានសំណូមពរដល់ស្ថាប័នសារព័ត៌មានទាំងអស់ត្រូវអនុវត្តនូវចំនុចសំខាន់ៗមួយចំនួនដូចជា:
១/ ស្ថាប័នព័ត៌មានទាំងរដ្ឋ និងឯកជនទាំងអស់ត្រូវដើរតួនាទីជាស្ថាប័នសារព័ត៌មានពិតគឺជាកញ្ចក់ឆ្លុះបញ្ចាំងអំពីសង្គមជាតិពិតប្រាកដសូមកុំឲ្យកញ្ចក់នោះជាកញ្ចក់ដែលបែកធ្លុះផ្សាយព័ត៌មានមិនពិត។
២/ ស្ថាប័នព័ត៌មានរដ្ឋ និងឯកជនទាំងអស់ត្រូវផ្សព្វ ផ្សាយព័ត៌មានពិតៗ ដោយមានការពន្យល់ច្បាស់លាស់ឱ្យទៅប្រជាពលរដ្ឋអោយបានយល់ជ្រួតជ្រាបអំពីទិសដៅ និងគោលនយោបាយរបស់រាជរដ្ឋាភិបាលហើយនាំយកនូវអ្វីដែលជាការពិតពីប្រជាពលរដ្ឋមកកាន់រដ្ឋាភិបាលវិញ គឺទាំងក្នុងកម្រិតតាក់តែង និងកម្រិតអនុវត្តន៍អោយមានប្រសិទ្ឋភាពខ្ពស់ ។
៣/ ស្នើអោយសារព័ត៌មានត្រូវចេះចូលរួមជួយរិះគន់ដើម្បីស្ថាបនារាល់កំហុសឆ្គង និងផែនការដែលបានដាក់ចេញនៃក្រសួងស្ថាប័ននានាដើម្បីធ្វើការកែលំអរ ហើយមិនមែនរិះគន់ដើម្បីតែជាន់ពន្លិចនោះទេ។
៤/ សំណូមពរឲ្យអ្នកសារព័ត៌មានចូលរួមសិក្សាវិភាគជាលក្ខណៈអន្តរជាតិដើម្បីបានដឹងអំពីរឿងរ៉ាវទាំងឡាយ ដែលកើតមានឡើងនៅលើពិភពលោកហើយក៏ចង់ឲ្យអ្នកសារព័ត៌មានជាតិយើងបានក្លាយទៅជាអ្នកវិភាគផងដែរចំពោះព្រឹត្តិការណ៍នៅក្រៅប្រទេស ពីព្រោះកន្លងមកមានបរទេសគេវិភាគ និងផ្សាយពីកម្ពុជា ដូច្នេះយើងត្រូវចេះសិក្សាបកស្រាយនិងវិភាគពីគេវិញផងដែរ។
៥/ សំណូមពរឱ្យការផ្សព្វផ្សាយព័ត៌មានទាំងអស់ផ្សាយ ត្រឹមត្រូវប្រកបដោយក្រមសីលធម៌និងវីជ្ជាជីវៈជាពិសេស សម្តេចតេជោ បានសំណូមពរដល់អ្នកប្រើប្រាស់នូវបណ្តាញសង្គម ( Facebook ) សូមកុំឲ្យមានការជេរប្រមាថហែកកេរ្តិ៍ខ្មាស់គ្នាដែលនាំឲ្យមានរឿងប្តឹងផ្តល់ និងឡើងតុលាការជាដើមសូមរក្សាតំលៃរបស់ខ្លួន ជាពិសេសអ្នកសារព័ត៌មានត្រូវធ្វើព័ត៌មានដែលច្បាស់ៗ ពិតកុំស្មានៗ ហើយក៏មិនត្រូវដើរតួនាទីជាតុលាការកាត់ក្តីនោះឡើយ ។
៦/ ត្រូវចូលរួមលុបបំបាត់អ្នកសារព័ត៌មានជម្រិតទារប្រាក់កុំធ្វើជាអ្នកសារព័ត៌មានសម្រាប់តែជម្រិតទាលុយគេឬមានលក្ខណៈដូចជាក្រុម “ម៉ាហ្វីយ៉ា”។
៧/ ជួយទប់ស្កាត់ព័ត៌មានក្លែងក្លាយដែលមិនបានផ្តល់ប្រយោជន៍ដល់សង្គមម្យ៉ាងវិញទៀតដើម្បីប្រយុទ្ធប្រឆាំង នឹងព័ត៌មានក្លែងក្លាយគឺអ្នកសារព័ត៌មានត្រូវបញ្ចេញព័ត៌មានពិតៗចេញមកបកស្រាយដើម្បីលុបបំបាត់នូវព័ត៌មានក្លែងក្លាយទាំងនោះ ។
៨/ ត្រូវខិតខំលើកកម្ពស់សមត្ថភាពបុគ្គលិកសារព័ត៌មាន ត្រូវតែធ្វើការបណ្តុះបណ្តាលធនធានមនុស្សនិងអភិវឌ្ឍន៍ ប្រព័ន្ធផ្សព្វផ្សាយជាពិសេសត្រូវទំនាក់ទំនងជាមួយបណ្តាសមាគមន៍ស្ថាប័នជំនាញសកលវិទ្យាល័យនិងក្រសួងព័ត៌មានជាដើមដើម្បីទទួលបានការបណ្តុះបណ្តាលនូវជំនាញសារព័ត៌មានបន្ថែមទៀត។
ម្យ៉ាងទៀតគឺត្រូវទាក់ទងរកអ្នកដែលមានជំនាញច្បាស់លាស់ដើម្បីបង្កើនគុណភាពការងារនិងការផលិតមានភាពកាន់តែល្អប្រសើរទន្ទឹមនឹងនោះដែរ សម្តេចតេជោ បានគាំទ្រនិងជំរុញអោយមានការរៀបចំយុទ្ឋនាការប្រកួតប្រជែង អំពី “ការផលិតព័ត៌មានពិតៗ ហើយលឿនៗ បើអាចធ្វើច្រើនភាសារ គឺរិតតែល្អ”។ សម្តេចតេជោ ក៏បានគាំទ្រ ជំរុញឱ្យមានប្រព័ន្ឋផ្សេព្វផ្សាយអនឡាញ(online)អោយបានច្រើនព្រោះសព្វថ្ងៃនេះអ្នកតាមដានព័ត៌មានមិនសូវរង់ចាំមើលតាមទូរទស្សនោះទេ។
នៅថ្ងៃនេះដែរ សម្តេចតេជោបានបញ្ជាក់ជូនអ្នកសារ ព័ត៌មានជាតិយើងទាំងអស់ថា៖ សម្តេចនឹងនៅបន្តដឹកនាំប្រទេសយ៉ាងហោចណាស់ដល់ឆ្នាំ ២០២៨ ដែលសម្តេច គ្រោងនឹងជួបបងប្អូនអ្នកសារព័ត៌មានចំនួន៩ដងថែមទៀត។នៅក្នុងឱកាសដ៏វិសេសវិសាលនេះដែរ សម្តេចតេជោ (ហ៊ុន សែន) នាយករដ្ឋមន្ត្រីបានជូនពរដល់បងប្អូនកូនក្មួយអ្នកសារព័ត៌មានជាតិទាំងអស់ជួបតែសេចក្តីសុខសេចក្តីចម្រើនព្រមទាំងជួបនូវពុទ្ឋពរទាំង៥ ប្រការគឺ៖ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ ៕
(ដោយសារព័ត៌មាននិងគេហទំព័រ” ខ្មែរអច្ឆរិយ:”http://www.khpress.net