ចេញផ្សាយថ្ងៃព្រហស្បត៍ ០៥កេីត ខែបុស្ស ឆ្នាំច សំរឹទ្ធិស័កព.ស.២៥៦២ ត្រូវនឹងថ្ងៃ១០ ខែមករា ឆ្នាំ២០១៩ !
ភ្នំពេញ ៖ សម្តេចតេជោហ៊ុនសែន និង សម្តេចកិត្តិព្រឹទ្ធបណ្ឌិតនឹងអញ្ចើញចូលរួមក្នុងជំនួបជាមួយអ្នកសារព័ត៌មានក្នុងស្រុកលើកទី៣ នៅថ្ងៃទី ១១ ខែមករា ឆ្នាំ២០១៩ដើម្បីបង្កើនការរឹតចំណងមិត្តភាព រវាងថ្នាក់ដឹកនាំរាជរដ្ឋាភិបាល និងអ្នកសារព័ត៌មាន។
យោងតាមរយៈផេកហ្វេសបុកផ្លូវការរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថ្ងៃទី១០ ខែមករា ឆ្នាំ២០១៩នេះថា នៅល្ងាចថ្ងៃសុក្រ ទី១១ មករានេះ ខ្ញុំនឹងជួបបងប្អូន និងក្មួយៗអ្នកកាសែត នៅក្នុងកម្មវិធីបាយសាមគ្គីនៅកោះពេជ្រ។
សម្តេចបានលើកឡើងថា ពិតប្រាកដណាស់ ការរីកចម្រើនរបស់ប្រទេសជាតិ គឺមិនអាចកាត់ផ្តាច់ពីការចូលរួមរបស់បងប្អូន និងក្មួយៗអ្នកសារព័ត៌មានបានឡើយ។ សម្តេចតេជោបានបន្តថា យើងបានបាត់បង់ឱកាសកសាងប្រទេសជាច្រើនឆ្នាំ មកហើយដោយសារសង្គ្រាម ប៉ុន្តែក្រោយពីប្រទេសជាតិមានសុខសន្តិភាពពេញលេញ គឺយើងត្រូវការទេសចរណ៍ ពាណិជ្ជករ និងអ្នកវិនិយោគទុនបរទេសជាច្រើនមកវិនិយោគនៅកម្ពុជា។ ដូច្នេះការចូលរួមផ្សព្វផ្សាយព័ត៌មានវិជ្ជមានពិតប្រាកដ គឺកាន់តែផ្តល់នូវទំនុកចិត្តដល់ទេសចរណ៍បរទេស និងវិនិយោគទុនបរទេស។
ជាចុងក្រោយសម្តេចតេជោបានអរគុណបងប្អូន និងក្មួយៗអ្នកសារព័ត៌មានជាតិ និងអន្តរជាតិទាំងអស់ រួមទាំងបណ្តាញព័ត៌មានអនឡាញ ( Online News ) និងអ្នកប្រើប្រាស់បណ្តាញសង្គមទាំងអស់ (Social Networks) ដែលបានចូលរួមផ្សព្វផ្សាយអំពីកម្ពុជា ទៅកាន់ពិភពលោកក្នុងផ្លូវវិជ្ជមាន ដើម្បីប្រទេសជាតិយើងកាន់តែរីកចម្រើនលឿនទៅមុខ។
នៅក្នុងឆ្នាំសកលថ្មី ២០១៩នេះ ខ្ញុំ និងភរិយា សូមជូនពរដល់បងប្អូន និងកូនក្មួយអ្នកសារព័ត៌មានជាតិ និងអន្តរជាតិទូទាំងប្រទេស ទទួលបានជោគជ័យក្នុងភាកិច្ចការងារ និងមានសុខសុភមង្គលក្នុងក្រុមគ្រួសារគ្រប់ៗគ្នា៕(ដោយសារព័ត៌មាននិងគេហទំព័រខ្មែរអច្ឆរិយ: http://www.khpress.net