ខេត្តមណ្ឌលគិរី: ក្រុងសែនមនោរម្យ
ចេញផ្សាយថ្ងៃអង្គារ ០៣ កើត ខែបុស្ស ឆ្នាំច សំរឹទ្ធិស័កព.ស.២៥៦២ ត្រូវនឹងថ្ងៃទី០៨ ខែមករា ឆ្នាំ២០១៩ !
នៅថ្ងៃទី០៧ ខែមករា ឆ្នាំ២០១៩ វេលាម៉ោង១៩និង៣០នាទី នៅចំណុចផ្លូវជាតិក្នុងខេត្តលេខ៣៧/៦៣ជិតរីស៊តដាយមិន ស្ថិតនៅភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី កម្លាំងអធិការដ្ឋាននគរបាលក្រុងសែនមនោរម្យ ដឹកនាំដោយលោកវរសេនីយ៍ឯក កាន់ ពេញ ក្រោមការបញ្ជាផ្ទាល់ពីឯកឧត្ដម ឧត្ដមសេនីយ៍ទោ ឡោ សុខា ស្នងការនគរបាលខេត្ត បានធ្វើការឃាត់រថយន្តដឹកឈើខុសច្បាប់ ចំនួន០១គ្រឿង ម៉ាកហ៊ីយុនដាយប្រភេទ៨តោន(កែច្នៃ) ពណ៌ស គ្មានស្លាកលេខ ដឹកឈើខុសច្បាប់ប្រភេទកកោះ ជាច្រេីនសន្លឹក(មិនទាន់រាប់)ចេញពីស្រុកកោះញែក។
លោកវរសេនីយ៍ឯក កាន់ ពេញ បានប្រាប់ឲ្យដឹងថាបន្ទាប់ពីទទួលបាននូវបទបញ្ជាពីឯកឧត្ដមស្នងការយ៉ាងតឹងរឹងករណីបង្ក្រាបបទល្មើសព្រៃឈើលោកបានដាក់កំលាំងល្បាតរាល់ថ្ងៃ យប់ ជាក់ស្ដែងកំលាំងបានបង្ក្រាបនូវរថយន្តខាងលើយកមកអធិការក្រុងដើម្បីកសាងសំណុំរឿងបញ្ជូនទៅស្ថាប័ណ្ឌជំនាញតាមនីតិវិធីចំណែកអ្នកបើកបរបានរត់គេចខ្លួនបាត់។
ដោយឡែករថយន្តនិងឈើខាងលើនៅព្រឹថ្ងៃ០៨ខែមករាឆ្នាំ២០១៩ យើងបានប្រគល់ឲ្យទៅកម្លាំងជំនាញនៃមន្ទីរបរិស្ថានខេត្តដើម្បីចាត់ការតាមផ្លូវច្បាប់។
(ដោយសារព័ត៌មាន និងគេហទំព័រខ្មែរអច្ឆរិយៈ) http://www.khpress.net