ចេញផ្សាយថ្ងៃអង្គារ ១០រោជ ខែមិគសិរ ឆ្នាំច សំរឹទ្ធិស័កព.ស.២៥៦២ ត្រូវនឹងថ្ងៃទី០១ ខែមករា ឆ្នាំ២០១៩
ឃ្លាំងស្តុកឈើឥតច្បាប់ដ៏ធំមួយកន្លែង ស្ថិតនៅចំណុច ភូមិស្រែស្បូវ ឃុំក្បាលដំរី ស្រុកសំបូរ ខេត្តក្រចេះដែលត្រូវបានប្រជាពលរដ្ឋនៅទីនោះ បានប្រាប់អ្នកយកព័ត៌មានយើងឲ្យដឹងថាជាឃ្លាំងស្តុកឈើរបស់លោកស៊ាម គឹមទឹម មានតួនាទីទាហានសឹករងនៅក្នុងខេត្តក្រចេះមានអំណាចខ្លាំងសូម្បីតែចៅហ្វាយខេត្តមិនខ្លាចផង។
ជាក់ស្ដែងនៅថ្ងៃអាទិត្យទី៣០ ខែធ្នូ ឆ្នាំ ២០១៨ វេលាម៉ោង ០៣ និង ២៩ នាទី រសៀល សារព័ត៌មានយើងបានទៅថតផ្ដិតយករូបភាពនៅកន្លែងទីតាំងឃ្លាំងស្តុកឈើនោះដោយផ្ទាល់ និងបានឃើញគំនរឈើស្តុកនៅក្នុងនោះជាច្រើនរាប់សិបម៉ែត្រគីបដោយមានរថយន្ដសាំយ៉ុង កែច្នៃចំនួនជាងដប់គ្រឿង កំពុងតែធ្វើសកម្មភាព រៀបឈើដាក់លើរថយន្ដ និងត្រៀមធ្វើការដឹកជញ្ជូនចេញនៅពេលយប់យកទៅចែកចាយទៅតាមបណ្ដាខេត្តនានាដូចជា ខេត្តក្រចេះ ខេត្តត្បូងឃ្មុំ ខេត្តព្រៃវែង រហូតដល់រាជធានីភ្នំពេញ៘
សូមបញ្ជាក់ផងដែរថារយៈពេលជាច្រើនរាប់ឆ្នាំកន្លងមកនេះ លោក ស៊ាម គឹមទឹម ដែលជាទាហានសឹករងខេត្តក្រចេះរូបនេះតែងតែយកតួនាទីនិងអំណាចយោធារបស់ខ្លួនទៅដើររកស៊ីទិញឈើនិងដឹកជញ្ជូនជារៀងរាល់ថ្ងៃ រាល់យប់យ៉ាងអនាធិប្បតេយ្យដោយគ្មានច្បាប់គ្មានទម្លាប់បំផ្លាញព្រៃឈើរបស់សង្គមជាតិយកទៅធ្វើមានធ្វើបានតែផលប្រយោជន៍ផ្ទាល់ខ្លួនដោយមិនគោរពកោតញញើតនូវ អនុសាសន៍នៃបទបញ្ជារដ៏ក្ដៅគគុករបស់សម្ដេចអគ្គមហាសេនាបតីតេជោ ហ៊ុន សែន ឡើយ។
ប្រជាពលរដ្ឋដែលរស់នៅក្នុងខេត្តក្រចេះបានបន្តទៀតថាមេឈ្មួញរកស៊ីកាប់បំផ្លាញព្រៃដុះស្លែរូបនេះមិនដែលចេះខ្លាចអ្នកច្បាប់ណាម្នាក់នោះឡើយដោយគេអាងថាបានបង់លុយឲ្យគ្រប់ជំនាញអស់ហើយពីថ្នាក់លើដល់ថ្នាក់ក្រោមមិនចន្លោះនោះបានបើកដៃឲ្យគេកាប់បំផ្លាញព្រៃសហគមទាល់តែអស់ទើបឈប់រកស៊ី។
ប្រជាពលរដ្ឋនិងប្រជាសហគមនៅក្នុងខេត្តបាននាំគ្នាសំនូមពរទៅដល់លោក វេង សាខុន រដ្ឋមន្ត្រីក្រសួងកសិកម្ម លោកសាយ សំអាល់ រដ្ឋមន្ត្រីក្រសួងបរិស្ថានជាពិសេសទៅនាយឧត្ដមសេនីយ៍ សៅ សុខា ជាប្រធាគណ:កម្មការបង្ក្រាបបទល្មើសធនធានធម្មជាតិថ្នាក់ជាតិលោកមានវិធានការផងបើមិនដូច្នេះទេព្រៃឈើរងការវិនាស់ខ្ទេចអស់មិនសល់ទេដោយសារមានការបើកភ្លើងខៀវពីមន្ត្រីថ្នាក់ក្រោម។
ពួកគាត់បន្ថែមថាស្នើសុំឲ្យថ្នាក់ជាតិបង្កើតគណ:កម្មការចំពោះកិច្នចុះមកខេត្តក្រចេះផង ដើម្បីអង្កេតលើសមត្តកិច្ច និងមន្ត្រីជំនាញគ្រប់ជាន់ថ្នាក់ទាំងអស់បើកដៃឲ្យបុគ្គលខាងលើកាប់បំផ្លាញព្រៃឈើគ្មានការបង្ក្រាបពិសេសទីតាំងឃ្លាំងស្តុកឈើឥតច្បាប់ដ៏ធំអនាធិបតេយ្យ របស់មេឈ្មួញជើងខ្លាំងប្រចាំខេត្តក្រចេះឈ្មោះ សាម គឹមទឹមដែលមានទីតាំងខាងលើ ៕
(ដោយសារព័ត៌មាននិងគេហទំព័រ” ខ្មែរអច្ឆរិយ: ” http:www.khpress.net)
