ចេញផ្សាយថ្ងៃច័ន្ទ ២រោជ ខែមិគសិ ឆ្នាំច សំរឹទ្ធិស័កព.ស.២៥៦២ ត្រូវនឹងថ្ងៃទី២៤ ខែធ្នូ ឆ្នាំ២០១៨
មណ្ឌលគិរី ៖ អគារថ្មី០១ខ្នងរបស់ស្នងការដ្ឋាននគរបាលខេត្តមណ្ឌលគិរី បានសម្ពោធដាក់ឲ្យប្រើប្រាស់ដែលជាជំនួយមិត្តភាពរបស់នគរបាលខេត្តដាក់ឡាក់ (វៀតណាម) ដែលប្រគល់ជូន ស្នងការដ្ឋាននគរបាលខេត្តមណ្ឌលគិរី ពិធីនោះប្រព្រឹតទៅ ក្រោមអធិបតី ឯកឧត្តម នាយឧត្តមសេនីយ៍ ហ៊ូ សាគុណ អគ្គស្នងការរងនគរបាលជាតិ ដោយមានការចូលរួមពីសំណាក់ឯកឧត្តម ស្វាយ សំអ៊ាង អភិបាលខេត្តមណ្ឌលគិរី លោក វរសេនីយ៍ឯក វូ ហុងវាំង ស្នងការនគរបាលខេត្តដាក់ឡាក់ នៃសាធារណរដ្ឋសង្គមនិយមវៀតណាម ដែលប្រព្រឹត្តទៅនៅស្នងការដ្ឋាននគរបាលខេត្តមណ្ឌលគិរីនារសៀលថ្ងៃទី២៣ ខែធ្នូ ឆ្នាំ២០១៨។
ឯកឧត្តមនាយឧត្តមសេនីយ៍ ហ៊ូ សាគុណ អគ្គស្នងការរងនគរបាលជាតិ និង ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានមានប្រសាសន៍ ថ្លែងអំណរគុណដល់ភាគីមិត្តភាពវៀតណាម នៃខេត្តដាក់ឡាក់ ដែលបានជួយឧបត្ថម្ភអាគារ១ខ្នង ជូនស្នងការដ្ឋាននគរបាលខេត្តមណ្ឌលគិរី។ ឯកឧត្តមបានបញ្ជាក់ថា ជំនួយអគារនេះបានឆ្លុះបញ្ចាំងពីទំនាក់ទំនាក់កិច្ចសហប្រតិបត្តិការល្អប្រសើរ រវាងខេត្តមណ្ឌលគិរី និងខេត្តដាក់ឡាក់ ហើយទំនាក់ទំនងកិច្ចសហប្រតិបត្តិការនេះ មានលក្ខណៈជាបងប្អូនជាអ្នករស់នៅភូមិផងរបងតែមួយ ហើយភាគីទាំងពីរ និងត្រូវរក្សាទំនាក់ទំនង កិច្ចសហប្រតិបត្តិការ សាមគ្គីភាពរវាងកម្ពុជា វៀតណាម អោយកាន់តែឋិតថេរ និងយូអង្វែង។
ជាមួយគ្នានេះផងដែរ ឯកឧត្តម ជម្រុញដល់មន្ត្រីនគរបាលជាតិទាំងអស់ត្រូវចូលរួមក្នុងការលើកស្ទួយប្រសិទ្ធភាពក្នុងការបំពេញភារកិច្ចជាកងកំលាំងរបស់នគរបាលខេត្តដើម្បីធានាអោយការរក្សាសន្តិសុខសណ្តាប់ធ្នាប់ជូនប្រជាពលរដ្ឋអោយបានល្អប្រសើរ និងចូលរួមទប់ស្កាត់បទល្មើសតាមបន្ទាត់ព្រំដែនឱ្យមានប្រសិទ្ធភាព។
លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានអោយដឹងថា អគារថ្មីមួយខ្នងរបស់ស្នងការដ្ឋានខេត្តមណ្ឌលគិរី នេះជាជំនួយឧប្បត្ថម្ភពីស្នងការដ្ឋាននគរបាលខេត្តដាក់ឡាក់នៃសាធារណរដ្ឋសង្គមនិយមវៀតណាម ដែលមានទំហំ១៣ម៉ែត្រ គុណ ៤២ម៉ែត្រ មានកំពស់០២ជាន់ ធ្វើអំពីឥដ្ឋ ប្រក់ស័ង្កសី ជារចនាបទខ្មែរ មានបន្ទប់ការិយាល័យចំនូន ១២ បន្ទប់រងចាំចំនួន០២និង សាលប្រជុំចំនួន០១ និងបានរៀបចំកៅអីរួចស្រេចចំនួន២១៧កៅអី។
លោកឧត្តមសេនីយ៍ទោ ឡោ សុខា បានឱ្យដឹងទៀតថា អគារនេះចាប់ផ្តើមសាងសង់ចាប់ពីថ្ងៃទី២៣ ខែធ្នូ ឆ្នាំ២០១៧ និងបានបញ្ចប់ការសាងសង់រួចរាល់នៅថ្ងៃទី២៣ ខែធ្នូ ឆ្នាំ២០១៨ ដែលចំណាយថវិកាអស់ប្រមាណជា ១៦៥,៧៥០ដុល្លា (មួយរយហុកសិបប្រាំពាន់ ប្រាំពីរយហាសិបដុល្លា ជាថវិកាដែលបានពីការជួយឧបត្ថម្ភពីស្នងការដ្ឋាននគរបាលខេត្តដាក់ឡាក់ នៃសាធារណៈរដ្ឋសង្គមនិយមវៀតណាមទាំងស្រុង។
(ដោយសារព័ត៌មាននិងគេហទំព័រ”ខ្មែរអច្ឆរិយ:” http://www.khpress.net)