ចេញផ្សាយថ្ងៃច័ន្ទ ២រោជ ខែមិគសិ ឆ្នាំច សំរឹទ្ធិស័កព.ស.២៥៦២ ត្រូវនឹងថ្ងៃទី២៤ ខែធ្នូ ឆ្នាំ២០១៨
ខេត្តមណ្ឌលគិរី : ស្រុកកោះញែក
បន្ទាប់ពីគណៈបញ្ជាការឯកភាពស្រុកកោះញែកចុះធ្វើការអប់រំណែនាំដល់ពលរដ្ឋ២១៦គ្រួសារដែលកំពុងអាស្រ័យផលនិងរស់នៅលើដីដែលអាជ្ញាធរស្រុកអះអាងថាជាដីក្រុមហ៊ុនសម្បទានសេដ្ឋកិច្ចរបស់ក្រុមហ៊ុនប៉ាស៊ីហ្វិកកាលពីថ្ងៃទី២៣ខែធ្នូនោះ គឺបណ្តាលមកពីក្រុមហ៊ុនពុំបានកំណត់ព្រំដីឱ្យបានច្បាស់លាស់ ហើយពុំមាននណាមកណែនាំតាំងពីឆ្នាំដំបូង។
កំឡុងពេលនៃការចុះណែនាំរបស់គណៈបញ្ជាការឯកភាពស្រុកកោះញែក ដែលដឹកនាំដោយ លោកផាង អឿង អភិបាលរង នៃគណៈអភិបាលស្រុកកោះញែក គណៈកម្មាធិការបានធ្វើការពន្យល់អប់រំណែនាំដល់ប្រជាពលរដ្ឋទាំងនោះ ឲ្យធ្វើការចាកចេញ ពីទីតាំងដែលកំពុងរស់នៅព្រោះទីតាំងនេះ គឺស្ថិតនៅលើទំហំផ្ទៃដី របស់ក្រុមហ៊ុន សម្បទានសេដ្ឋកិច្ច ឈ្មោះប៉ាស៊ីហ្វិកហ្គ្រេន ពេលនេះអាជ្ញាធរមានសមត្ថកិច្ចនាពេលនោះ បានជំរុញ ឲ្យក្រុមប្រជាពលរដ្ឋ ធ្វើការវិលត្រឡប់ ទៅលំនៅដ្ឋានចាស់វិញ។
តំណាងប្រជាពលរដ្ឋដែលកំពុងរស់នៅលើដីក្រុមហ៊ុនប៉ាស៊ីហ្វិចបានបញ្ជាក់អំពីរយៈពេលនៃការរស់នៅរបស់ពួកគេរហូតដល់ទៅ៣ឆ្នាំដោយពុំមាន អាជ្ញាធរមូលដ្ឋាន ឬតំណាងក្រុមហ៊ុនប៉ាស៊ីហ្វិចមកប្រាប់ឬបញ្ជាក់ ថាទីតាំងនេះជាដីដែលស្ថិតនៅលើទំហំផ្ទៃដីរបស់ក្រុមហ៊ុន នោះទេ។
ក្រុមប្រជាពលរដ្ឋទាំងនោះ បានបញ្ជាក់ថា ទោះបីជាអាជ្ញាធរចុះអប់រំណែនាំឲ្យពួកគាត់ចាកចេញពីដីដែលកំពុងតែអាស្រ័យផល និងរស់នៅនេះ ពួកគាត់ដាច់ខាត ស៊ូស្លាប់មិនធ្វើការចាកចេញឡើយ។ ក្រុមប្រជាពលរដ្ឋដដែលបានបញ្ជាក់ថា រយៈពេលនៃការរស់នៅលើដីនេះ ៣ឆ្នាំទៅហើយ ហេតុអ្វី បានជាក្រុមហ៊ុនប៉ាស៊ីហ្វិច មិនមកធ្វើការកំណត់ទីតាំងព្រំដី ឬដាក់ស្លាកសញ្ញាបញ្ជាក់ថា ទីតាំងនេះជាដីសម្បទានសេដ្ធកិច្ច? ទើបតែពេលដែលប្រជាពលរដ្ឋរស់នៅច្រើនទៅៗបានជាមកអះអាងថាជាដីរបស់ក្រុមហ៊ុនទៅវិញ។
លោកផាង អឿង អភិបាលរងស្រុកកោះញែក បានបញ្ជាក់ប្រាប់អ្នកកាសែតថា ចំណុចដែលប្រជាពលរដ្ឋលើកឡើងខាងលើ វាជាចំណុចមួយ ដែលធ្វើឲ្យ អាជ្ញាធរស្រុក ពិបាកនៅក្នុងការដោះស្រាយ ប៉ុន្តែទោះជាយ៉ាងណា គណៈបញ្ជាការឯកភាពស្រុកនៅពុំទាន់មានចំណាត់ការ អ្វីក្រៅពីការចុះទៅអប់រំលើកទី១ ហើយជំហ៊ានបន្ទាប់ថាត្រូវធ្វើយ៉ាងណាលោកនៅពុំទាន់បានដឹងច្បាស់ឡើយដោយរង់ចាំថ្នាក់លើជាអ្នកសម្រេច។
លោកផាង អឿង បញ្ជាក់ទៀតថា ប្រជាពលរដ្ឋទាំង ២១៦ គ្រួសារ ដែលកំពុងរស់នៅលើដីរបស់ក្រុមហ៊ុនប៉ាស៊ីហ្វិចនេះ ពួកគាត់ ពុំមានការស្នើសុំទៅអាជ្ញាធរ ដើម្បីធ្វើការរស់នៅទីនេះនោះឡើយ។ ក្នុងនោះ ប្រជាពលរដ្ឋទាំង ២១៦គ្រួសារ ត្រូវគេបញ្ជាក់ថា ជាកម្មករ ដែលធ្វើការនៅក្នុងក្រុមហ៊ុនប៉ាស៊ីហ្វិកហ្គ្រេននេះ ផ្ទាល់ ហើយដោយសម្លឹងឃើញ អំពី ក្រុមហ៊ុនបានធ្វើការឈូសឆាយលើផ្ទៃដីតំបន់នេះ ទើបប្រជាពលរដ្ឋ បានធ្វើការកាប់រុករាន ដីព្រៃ ដែលមានទំហំរហូតដល់ទៅ៨០០ហិកតា ធ្វើការរស់នៅនិងអាស្រ័យផលតែម្ដង។
នៅព្រឹកថ្ងៃទី២៤ខែធ្នូមានតំណាងក្រុមហ៊ុនម្នាក់ឈ្មោះសា ជាជនជាតិវៀតណាបានបំភ្លឺថា ពលរដ្ឋដែលមករស់នៅលេីដីក្រុមហ៊ុននៅឆ្នាំ២០១៦មករស់នៅមានចំនួនតិចមកដល់ឆ្នាំ២០១៨នាំគ្នាមករស់នៅច្រេីននាំគ្នាមករំលោភលេីដីក្រុមហ៊ុន លោកបានបន្តទៀតថា រាល់ការងារដំណោះស្រាយយ៉ាងណានោះទុកអោយថ្នាក់លេីដោះស្រាយចុះដោយសារក្រុមហ៊ុនបានទទួលសិទ្ធិ វិនិយោគ ដីសម្បទានសេដ្ឋកិច្ចពីរាជរដ្ឋាភិបាលកម្ពុជា លើទំហំផ្ទៃដី 4 ម៉ឺនហិកតា។
(ដោយសារព័ត៌មាននិងគេហទំព័រ”ខ្មែរអច្ឆរិយ: http://www.khpress.net)