ព្រះវិហារ: សៀមរាប
ចេញផ្សាយថ្ងៃអង្គារ៍ ១១ កើត ខែមិគសិរ ឆ្នាំច សំរឹទ្ធិស័កព.ស២៥៦២ ត្រូវនឹងថ្ងៃទី១៨ ខែធ្នូ ឆ្នាំ២០១៨
មេឈ្មួញដុះស្លែ លោក ធឹម លាងស្រេង កំពុងរកស៊ីដឹក ឈើយ៉ាងរលូនចេញពីខេត្តព្រះវិហារជារៀងរាប់យប់យកមកលក់ឲ្យតាមបណ្ដាដេប៉ូផ្សេងៗ ក្នុងខេត្តសៀមរាបយ៉ាងរលូនពុំមានការបង្ក្រាបពីសមត្ថកិចច្ចនិងមន្ត្រីជំនាញឡើយ។
តាមប្រភពព័ត៌មានពីប្រជាពលរដ្នបានឲ្យសារព័ត៌មាននិងគេហទំព័រ” ខ្មែរអច្ឆរិយ:”ដឹងថា ជារៀងរាល់យប់គេបានប្រទះឃើញ លោក ធឹម លាងស្រេង ប្រើប្រាស់រថយន្ដ ចំនួនពីរគ្រឿង ម៉ាកសាំយ៉ុង ពណ៌ស្លែ ត កន្ទុយ និងកង់ឌុប សម្រាប់ដឹកឈើបន្ដចែកចាយទៅដល់បណ្ដាដេប៉ូផ្សេងក្នុងខេត្តសៀមរាបដោយ លោក នៅ ចាន់គាង និងលោក ចេង ត្រូវជាបងថ្លៃរបស់ លោក ធឹម លាងស្រេង ជាអ្នកប្រមូលទិញឈើពីខេត្តព្រះវិហារ ហើយដឹកឈើយកមកស្ដុបទុកឃ្លាំងស្រុកស្វាយលើ ខេត្តសៀមរាប ព្រំប្រទល់ខេត្តព្រះវិហារចំណែកនៅខេត្តសៀមរាបលោក ធឹម លាងស្រេង មានមេការម្នាក់ ឈ្មោះ ពៅ មើលការខុសត្រូវ។
បើតាមប្រភពច្បាស់ការ បានអះអាងថា លោក ធឹម លាងស្រេង គឺជាមេឈ្មួញដុះស្លែល្បីល្បាញច្រើនទសវត្សរ៍មកហើយ ប្រចាំខេត្តព្រះវិហារ និងខេត្តសៀមរាប ហើយក៏ជាឈ្មួញឆ្លងដែនជំនួញឈើប្រណីត ប្រចាំខេត្តសៀមរាប បានឃុបឃិតផ្តល់ប្រយោជន៍ ទៅឲ្យស្ថាប័នពាក់ព័ន្ធ នៅខេត្តទាំងពីរ គឺខេត្តព្រះវិហារ និងខេត្តសៀមរាបទើបអាចដំណើរការយ៉ាងរលូនមកទល់សព្វថ្ងៃ ។
ប្រភពបន្ដថា លោកធឹម លាង ស្រេង បានប្រមូលទិញឈើនៅចំណុចភូមិពោទាប និងពោប្រមេ ឃុំម្លូរព្រៃ១ ស្រុកឆែប ខេត្តព្រវិហារ ដែលកាប់ក្នុងដែនអភិរក្សព្រៃព្រះរកា យកមកស្ដុបទុកឃ្លាំងស្រុកស្វាយលើ ខេត្តសៀមរាប ព្រំប្រទល់ខេត្តព្រះវិហារ យកលក់បន្តតាមបណ្ដាលដេប៉ូផ្សេងក្នុងខេត្តសៀមរាប ។
ពលរដ្នបានឲ្យដឹងទៀតថាបើសង្ឃឹម មន្ដ្រីជំនាញ និងអាជ្ញាធរមានសមត្ថកិច្ចក្នុងខេត្តចុះបង្ក្រាបនោះរាប់រយឆ្នាំទៀតមិនអាបង្ក្រាបបានដែរ លុះត្រាតែមន្ដ្រីក្រសួងមហាផ្ទៃ ដាក់បទបញ្ជាយ៉ាងម៉ឺងម៉ាត់ ឲ្យសមត្ថកិច្ចប្រដាប់អាវុធជួយទប់ស្កាត់បទល្មើសព្រៃឈើ ទើបមានប្រសិទ្ធភាព ។
(ដោយសារព័ត៌មាននិងគេហទំព័រ”ខ្មែរអច្ឆរិយៈ”http:// www.khpress.net)